1in.am-ը գրում է․
Վրաստանի վարչապետ Իրակլի Ղարիբաշվիլին հայտարարում է, որ Վրաստանում որևէ քաղաքական հետապնդման մասին խոսք չկա և այդ առնչությամբ որևէ հարց գոյություն չունի: «Գրուզիա Օնլայն»-ի հաղորդմամբ՝ այս մասին Ղարիբաշվիլին ասել է լրագրողներին՝ մեկնաբանելով ԱՄՆ Պետդեպի հայտարարությունը:
«Դա նորմալ է, սովորական: Որևէ քաղաքական հետապնդման մասին խոսք չկա: Մենք արդեն այս կապակցությամբ հայտարարություն արել ենք: Ոչ մի խնդիր և ոչ մի հարց չկա»,- հայտարարել է Ղարիբաշվիլին:
Սեպտեմբերի 13-ին ԱՄՆ Պետդեպը հայտարարություն էր տարածել, որում Վրաստանին, բոլոր ժողովրդամետ և եվրաատլանտամետ ուժերին կոչ էր արել կենտրոնանալ իրենց ընդհանուր շահերի վրա՝ հիմնված վերջին ձեռքբերումների վրա:
ԱՄՆ Պետդեպն այդ ուժերին կոչ է անում երկրի առաջխաղացման համար հետագա համատեղ աշխատանք տանել, լուծել հրատապ տնտեսական և տարածաշրջանային խնդիրները:
«Մեզ անհանգստացնում են շարունակվող հետապնդումները և ընդդիմության դեմ հարուցված քրեական գործերը, ինչպես նաև ռիսկերը, որոնք վրացական ժողովրդավարության համար կստեղծեն քաղաքականացված դատական հետապնդումներ: ԱՄՆ-ը շարունակում է աջակցել Վրաստանի ժողովրդավարական զարգացմանը, որը պետք է ներառի հարգանք քաղաքական բազմակարծության և բաց քննարկման նկատմամբ»,- ասվում է հայտարարության մեջ:
