Galatv.am-ը գրում է.
Գյումրեցի թոշակառու 82-ամյա Գրիշա Նիկողոսյանը, ինչպես ինքն է ասում, կյանքի մեծ մասը նվիրել է երեխաների դաստիարակությանն ու հայրենի քաղաքի շենացման գործին, սակայն այսօր, երբ վաստակած հանգստի է անցել, ստիպված է իր ծերության թոշակի մեծ մասը հատկացնել բնակարանի վարձավճարին, որպեսզի չհայտնվի դրսում:
Գիտակցական կյանքի մեծ մասը նա աշխատել ու 2 բնակարան է կառուցել, սակայն հիմա արդեն ստիպված է վարձով ապրել:
«Ամբողջ կյանքս ներդրել եմ իմ սիրած գործին, զարգացրել եմ պետություն, 9 երեխա եմ ունեցել, չեմ դժգոհում, լավ եմ ապրել, աշխատել եմ Լենինականի տեքստիլ կոմբինատում որպես ավագ ինժեներ: Լինելով բազմազավակ ընտանիքի հայր՝ կոմբինատը ինձ լավ աշխատավոր լինելու համար հատկացրեց 2 բնակարան, մեկը 3 սենյականոց, մյուսը՝ 1: Սակայն երկրաշարժից հետո երկու բնակարաններս էլ հողին հավասարվեցին: 90-ականներին 3 սենյականոց բնակարանս փոխհատուցեցին, իսկ 1 սենյականոց բնակարանս այդպես էլ չտեսա: Գյումրու քաղաքապետարանը տեղեկացրեց, որ Անտառավան 3-րդ թաղամասում վերակառուցված 25 շենքում ես բնակարան ունեմ, անգամ կտրոն հատկացրին: Սակայն այդպես էլ չկարողացա տեր կանգնել դրան: Ձեռքումս մնաց միայն քաղաքապետարանի կողմից տրված տեղեկանքը՝ «կցման թուղթը», որում նշված էր բնակարանի հասցեն եւ հատկացման համարը»:
82-ամյա թոշակառուն սակայն երբ ներկայացել է բնակարան ստանալու, նրան մերժել են: Բնակարանների հանձնման ժամանակ նա ներկայացել է մարզպետարան, բայց պատճառաբանել են, թե Գրիշա Նիկողոսյանին չի հասնում բնակարան:
«Ես հիմա վարձակալական հիմունքներով ապրում եմ Գյումրու Մանուշյան 3-րդ ա շենքի 12 բնակարանում իմ տարեց կնոջ հետո:
Անի թաղամասում հատկացված 3 սենյականոց բնակարանս վերջերս վաճառեցի եւ այդ գումարը բաժանեցի զավակներիս:
Հիմա ամուսիններով ընդամենը 50.000 դրամ կենսաթոշակ ենք ստացել, որը հազիվ բավականացնում է սննդի համար, իսկ տան վարձը չգիտեմ էլ ոնց ենք տալիս»:
82-ամյա հպարտ թոշակառուն որդիներից գումար չի վերցնում. նրանք հազիվ են կարողանում իրենց ընտանիքները պահել:
«Ես աշխատող, քարը սեղմող ու արյուն հանող մարդ եմ եղել, էս երկրի համար լավ եմ աշխատել, բայց ինձ լավ թոշակառուի պես չեն գնահատում: Իսկ ինձ իմ ներքին ձայնը թույլ չի տալիս, որ լամ ու բողոքեմ, կամ էլ սրա-նրա դուռը թակեմ ու փող խնդրեմ»:
Ամբողջական հոդվածը կարող եք կարդալ այստեղ
