Ամեն ինչի ծայրահեղը վատ է։ Թեպետ վերջին տասնամյակում մեր տեսած ցուրտ ձմեռները մեզ համոզեցին, որ շոգի ծայրահեղն էլ նորմալ ցրտից լավ է։

Սակայն երբ հարցին մոտենում ենք մասնագիտորեն, պարզ է դառնում, որ ծայրահեղ շոգը պակաս վտանգավոր չէ (եթե չասենք՝ ավելի), քան սառնամանիքը։

Նախ նշենք, որ ծայրահեղ ջերմաստիճաններից առաջացող հիվանդությունները հնարավոր է կանխել, պարզապես պետք է պահպանել հետեւյալ կանոնները.

- խուսափեք գտնվել բաց օդում օրվա ամենաշոգ ժամերին.
- գործունեության ակտիվության մակարդակը հարմարեցրեք շրջապատի ջերմաստիճանին.
- հաճախակի ընդմիջումներ կատարեք.
- հագնվեք եղանակին համապատասխան.
- խմեք մեծ քանակությամբ հեղուկ.
- սնվեք կանոնավոր և լիարժեք։

Եվ այսպես՝ ծայրահեղ ջերմաստիճանի ազդեցությունից խուսափելու և դրանից առաջացած հիվանդությունները կանխելու առաջին միջոցն օրվա ամենաշոգ ժամերին բաց օդում չգտնվելն է։ Օրինակ՝ եթե պետք է աշխատեք դրսում, շոգ եղանակին, ծրագրեք այնպես, որ գործն անեք առավոտյան կամ երեկոյան, երբ արևի ճառագայթումն այնքան էլ ուժեղ չէ։ Եթե, այնուամենայնիվ, ստիպված եք աշխատել շոգ ժամերին՝ նվազեցրեք ակտիվությունը, հաճախ ընդմիջում արեք։ Ընդմիջումները նպաստում են, որ մարմինը վերականգնի նորմալ ջերմաստիճանը և դիմակայի ծայրահեղ շոգի կարճատև ազդեցությանը։ Նույնը վերաբերում է նաև մարզումներին. շոգ ժամերին չի կարելի անցկացնել ծանրաբեռնված մարզումներ։

Հարկավոր է հագնվել եղանակին համապատասխան։ Շոգ օրերին պետք է հագնել բաց գույնի զգեստ, քանի որ բաց գույները, հատկապես սպիտակը, անդրադարձնում են լուսային ճառագայթի ողջ փունջը (սևը՝ այն ամբողջությամբ կլանում է)։ Նախընտրելի է բամբակյա հագուստը, քանի որ բամբակը կլանում է քրտինքը՝ հնարավորություն տալով‚ որ օդը թափանցի գործվածքի միջով։ Տեղի է ունենում ջերմատվություն, քրտնքի գոլորշիացում, ինչը պաղեցնում է մարմինը։ Շատ կարևոր է նաեւ ծածկել գլուխը հովանոցով կամ գլխարկով։

Շոգ եղանակին հարկավոր է խմել բավականաչափ հեղուկ և կանոնավոր սնվել։ Ամռանը պետք է ընդունել սառը հեղուկներ, եթե հնարավորություն չկա այն սառեցնելու՝ պարզապես օգտագործեք շատ ջուր։ Խուսափեք կոֆեին և ալկոհոլ պարունակող խմիչքներից, դրանք խաթարում են մարմնի ջերմակարգավորող համակարգը։

Աղբյուր՝ «Արտակարգ ալիք»

Կարդալ այլ օգտակար խորհուրդներ

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել