Առնվազն անհասկանալի է ինձ համար, թե ինչպես կարելի է սոցցանցերում տարածել այնպիսի նյութեր, որոնք պետք է գրվեն ավելի ուշ: Օրինակ՝ սահմանային գյուղերից մեկում, երբ կրակոցներ են հնչում, կարող ես հանդիպել, որ ինչ-որ մեկը գրել է, որ շտապ տարածեն, որ այսինչ գյուղում կրակում են, և թարմ տեսանյութ է տարածվում: Կամ ինչ-որ հատվածում դիվերսիոն փորձ են կատարում թշնամիները, իսկ այդ նույն պահին մեկը շտապ սկսում է դրա մասին տարածել: Հասկացեք, որ այդ պահին, հենց նույն պահին, որ սկսում եք տարածել այդ լուրը, որում գրված է «շտապ», «հենց հիմա». դա ոչ միայն չի օգնում դիրքապահ զինվորին կամ սահմանամերձ գյուղի բնակչին, այլև մարդկանց մոտ խուճապային տրամադրություններ է առաջացնում: Բանակը այդ դիվերսիոն փորձ անողների պորտը տեղն է դնում, սահմանամերձ գյուղի բնակչին էլ չես վախեցնի կրակոցով: Բայց պետք չէ այդ մասին միանգամից, կատարվելու պահին տարածել. դա խուճապ է ստեղծում, եթե համբերեք, մի փոքր ուշ ՊՆ-ն կտա հաղորդագրությունը և կիմանանք մանրամասները, ոչ թե վախախառը ստատուսներ գրեք՝ երկու նախադասություն լսած լինելով:
