ԱՄՆ-ի Միսուրի նահանգի Կանզաս քաղաքում մի գեղեցիկ կանաչապատ զբոսայգի կա: Խոսքը Դոնալդ Ջեյ Հոլի անվան զբոսայգու մասին է: Այս զբոսայգու բացման 25-ամյակի կապակցությամբ զբոսայգու հարավային մասում ապակե լաբիրինթոս է տեղադրվել: Ապակե լաբիրինթոսի կառուցումը հովանավորել է Հոլերի ընտանեկան հիմնադրամը: Լաբիրինթոսի նախագծի հեղինակը հանրահռչակ Ռոբերտ Մորիսն է: Մորիսն ամենից հայտնի է իբրև քանդակագործ, սակայն այս մարդը բազմակողմանիորեն զարգացած է և նշանակալի ավանդ ունի արվեստի տարբեր ճյուղերում: Նա նկարիչ է, գրող, պարուսույց, մի խոսքով՝ արվեստը նրա տարերքն է: Ապակե լաբիրինթոսը Մորիսի ամենահաջողված աշխատանքներից է: Այս լաբիրինթոսում նշմարվում է պատմական հինավուրց շինությունների ճարտարապետական ոճը: Այնուամենայնիվ, ապակե լաբիրինթոսը չի կարելի հնաոճ համարել, քանի որ դասականն ու ժամանակակիցը միահյուսված են այս պերճաշուք կառույցի մեջ:
