ArmnewsTV.am-ը գրում է.
Տեղադրե՞լ Անաստաս Միկոյանի արձանը, թե՞ ոչ: Եղեգնաձորում այդ քննարկումները եղել են ավելի վաղ ու ավելի անաղմուկ: Անաստաս Միկոյանի արձանը տեղադրվել է 1947 թվականին, իսկ Միկոյան ավանից Եղեգնաձոր քաղաքը վերանվանվել է 1958-ին:
Նախկին միկոյանցիներից ոչ բոլորը գիտեն, որ քաղաքային այգում հենց ԽՍՀՄ մինիստրների խորհրդի ղեկավար, առաջին քարտուղարի տեղակալ Անաստաս Միկոյանի արձանն է: Շփոթության կամ անտեղյակության պատճառներից մեկն էլ այգու ավանում է: Այգին Մոմիկի անվան է: Մոմիկի արձանը, սակայն, այգու մուտքի մոտ անվնաս կանգնած է, մինչդեռ Միկոյանի արձանը մի քանի անգամ հայտնվել է վանդալների թիրախում:
Ուղիղ 70 տարի առաջ Անաստաս Միկոյանի հուշարձանը հայտնվեց նաեւ Էջմիածնի քաղաքային այգում: Տարիներ անց քաղաքային զբոսայգու տարածքը դարձավ Մայր Աթոռի սեփականությունը, բայց կիսանդրին մնաց տեղում: Մայր Աթոռում հաստատում են միայն մեկ փաստ` Անաստաս Միկոյանը եղել է Գևորգյան հոգևոր ճեմարանի սան: Անուշ Միքայելյանը Գևորգյան ճեմարանի 30 տարվա խոհարարն է: Անաստաս Միկոյանի արձանը ամեն օր է տեսել աշխատանքի գալիս, բայց երբեք չի հետաքրքրվել, թե երբ և ինչու է նրա հուշարձանը հայտնվել այստեղ: Գևորգյան ճեմարանի աշխատակիցը, սակայն, լավ է հիշում մի բան` կիսանդրին կար, իսկ ցուցատախտակը` ոչ:
Միկոյանի արձանները տեղադրվել են ԽՍՀՄ տարիներին, Անկախ Հայաստանում նրա արձանը տեղադրելուն դեմ է Միկոյանի կենսագրությանը շատ լավ ծանոթ ճարտարապետ Հրաչիկ Պողոսյանը: Կարծում է , որ քաղաքական եւ ոչ ազգային գործիչների արձանները տեղադրել ու նրանց անուններով փողոցներ անվանել ընդհանրապես չի կարելի, նրանց գործունեությունը գուցե արդարացվի քաղաքական ռեժիմով, բայց սերունդները չեն ներում:
Գրող Հուսիկ Արան նույնպես դեմ է: Միկոյանի անունը, որպես բացասական գործչի լսել է դեռ մանկուց, հասարակական ընկալումը նրա նկատմամբ միանշանակ է: Իսկ գնդակահարության ենթակա հայերի ցուցակը Միկոյանի նախաձեռնությամբ ընդլայնելը պատմական փաստ է:
Գրողն առաջարկում է հասարակական լսումներ անել, չնայած առանց այդ էլ հասարակական կարծիքը պարզ է: Մինչդեռ Խորհրդային ռեժիմի ոչ պակաս հայտնի ներկայացուցիչներ Շահումյանի, Խանջյանի ու Մյասնիկյանի արձանների մասին երեւէ բացասական վերաբերմունք չի եղել:
Տեսանյութը կարող եք դիտել այստեղ
