Ձեզ երբևէ բախտ վիճակվե՞լ է նախաճաշել ընձուղտների հետ: Եթե ոչ, ուրեմն ճիշտ ժամանակն է այցելել «Ընձուղտների կալվածատուն»: Դեռևս 1930-ականներից «Ընձուղտների կալվածատունը» Նայրոբիի ամենահայտնի պատմական կառույցներից է: 57 հեկտար տարածության վրա սփռված այս կալվածատուն-հյուրանոցի մոտակայքում բնակվում է ընձուղտի ամենավտանգված տեսակներից մեկը, որը հայտնի է Giraffa camelopardalis rothschildi անվանմամբ: Հաջողակ այցելուները, ովքեր հանգրվանում են «Ընձուղտների կալվածատանը», ընձուղտների ընկերակցությամբ են վայելում իրենց համեղ նախաճաշը: Ընձուղտները սիրում են առավոտյան ուտելիք թռցնել հյուրանոցի այցելուների սեղանից, դե իսկ այցելուներն այնքան էլ դեմ չեն դրան: Սկզբում այս շինությունը կառուցվել է իբրև ընտանեկան առանձնատուն, հետագայում այն գնվել է Ջոք ու Բեթի Լեսլի-Մելվիլների կողմից: Նրանք ողջ աշխարհում հայտնի են բնաջնջման եզրին հայտնված կենդանիների պաշտպանությանն ուղղված իրենց ջանքերի շնորհիվ: Լեսլի-Մելվիլները հիմնել են Վայրի կենդանատեսակների պաշտպանության աֆրիկյան հիմնադրամը, որի աշխատակազմի ակտիվ ջանքերի շնորհիվ Giraffa camelopardalis rothschildi տեսակի ընձուղտների թիվը վերջին տարիներին զգալիորեն ավելացել է: Ընձուղտների կալվածատունը գտնվում է Քենիայի Նայրոբի քաղաքում: Կալվածատանը կա 10 սենյակ: Այն կարող է հյուրընկալել մինչև 25 այցելուի: Այս կալվածատանը կանգ են առել այնպիսի հայտնի մարդիկ, ինչպիսիք են Միք Ջագգերը, Էվան Մաքգրեգորը, Ռիչարդ Բրենսոնը և այլք:
