Բանանը 26-ամյա Քեյսուկե Յամադայի ամենասիրելի մրգերից է, սակայն նա ոչ միայն սիրում է բանան ուտել, այլև սքանչելի քանդակներ ստեղծել դրանից: Նա մասնագիտությամբ էլեկտրիկ է, սակայն ոչնչով չի զիջում պոֆեսիոնալ փորագրիչներին: Երբ նրան հարցնում են, թե ինչպես սկսեց զբաղվել բաննաների փորագրությամբ, նա պատասխանում է, որ ամեն ինչ շատ պատահական է ստացվել: Նրա կյանքում մի շատ ձանձրալի փուլ էր սկսվել: Ձանձրույթից ազատվելու համար Քեյսուկե Յամադան ձեռքն առավ գդալն ու ատամի փայտիկները և փորձեց մարդկային դեմք փորագրել կճպած բանանի վրա: Հետագայում նա ավելի բարդ պատկերներ սկսեց փորագրել: Ներկայումս նրա ստեղծագործությունների շարքում կան կենդանիների, հայտնի կինոնկարների ու մուլտֆիլմերի հերոսների քանդակներ: Քեյսուկեն բազմիցս հյուրընկալվել է տարբեր հեռուստաշոուներում և ուղիղ եթերում ցուցադրել իր ձեռքի շնորհքը: Յուրաքանչյուր քանդակի վրա նա ծախսում է 30 րոպեից մինչև մեկ ժամ: Սկզբնական շրջանում Յամադան լրջորեն չէր վերաբերվում իր հոբբիին, սակայն երբ նրա քանդակների լուսանկարները հայտնվեցին ճապոնական Pixiv կայքում, դրանք մեծ տարածում ստացան համացանցում: Անծանոթ մարդիկ կապ էին հաստատում Քեյսուկեի հետ և տարբեր գաղափարներ հուշում նրան: Երիտասարդ փորագրիչը ոգեշնչվեց նման բուռն արձագանքից և սկսեց ավելի շատ ժամանակ հատկացնել իր հոբբիին: Ամենազվարճալին այն է, որ հենց որ գլուխգործոցը պատրաստ է լինում, նա անմիջապես ճաշակում է բանանը:
