1in.am-ը գրում է.
Հայաստանում օրեցօր նոր աղանդներ են մուտք գործում: Վերջերս բացահայտվել է անգամ 2003-ից գործող Գեյ քրիստոնյա աղանդը, որտեղ հավաքված են միասեռականներ: Նրանք համասեռամոլություն են քարոզում: Այս աղանդի հետևորդներն անգամ Հիսուսին են համասեռամոլ համարում: Այսօր տեղի ունեցած մամուլի ասուլիսի ժամանակ այս մասին ասաց Միացյալ երիտասարդական լիգայի համանախագահ Դանիել Պետրոսյանը:
«Բացի այդ, վերջերս մեզ է դիմել Էրեբունի վարչական շրջանից մի աղջիկ, ով հայտնել է «Պենտեկոստե» անունով աղանդի մասին: Դրա հոգևոր հովիվը Նինել Մովսիսյանն է՝ չնայած Աստվածաշունչն արգելում է կանանց կողմից իրականացվող քարոզը: Հատկանշական է, որ այս աղանդի հետևորդները իրենց եկեղեցուն են նվիրաբերում ոսկի և դրամ: Նրանց հավաքատեղիի բեմի վրա միշտ տոպրակներ են՝ նվիրաբերությունների համար: Իսկ ահա Շենգավիթ վարչական շրջանում ճամբարի անվան տակ գործող «Հույսի տուն» աղանդի մեջ ներգրավված են բազմաթիվ երեխաներ»,- ասաց նա՝ հավելելով, որ աղանդներն ամենից հաճախ «որջեր» են հիմնում հենց Էրեբունի վարչական շրջանում, որտեղ շատ են շրջաններից եկած ուսանող-երիտասարդները:
Անդրադառնալով «Կյանքի խոսք» աղանդի առաջնորդ Ուլֆ Էքմանի՝ կաթոլիկ եկեղեցու հետևորդ դառնալու հանգամանքին՝ Դանիել Պետրոսյանը հավելեց, որ սա ոչ մի հիմք չի տալիս ենթադրելու, որ «Կյանքի խոսքի» բոլոր հետևորդները կաթոլիկներ կդառնան: «Բացի այդ, ոչ ոք չի նշում, որ Էքմանը ոչ թե անմիջական կաթոլիկ եկեղեցու հետևորդ է դարձել, այլ կաթոլիկ եկեղեցու, այսպես ասած, աղանդավորական մի ճյուղի»,- ասաց նա:
Ասուլիսի մյուս բանախոս՝ Միացյալ երիտասարդական լիգայի համանախագահ Սևակ Հովհաննիսյանն էլ իր հերթին հավելեց, որ Պենտեկոստեի հավաքներին չգնալու ցանկություն հայտնած մի անչափահաս աղջկա գցել են սրբապատկերներով մի սենյակ, երեք օր առանց հացի պահել՝ ասելով, որ այդպիսով դևերը նրա միջից դուրս կգան:
