Մի լուսանկարը կարող է հիմնովին փոխել լուսանկարչի կյանքը: Այդպես եղավ նաև Մարկ Թիպլի հետ: Նա ձեռնամուխ եղավ մի հետաքրքիր լուսանկարչական նախագծի իրականացման: Այդ նախագիծը կոչվում է «Ստորջրյա նախագիծ»: Նախագծի առանձնահատկությունն այն է, որ դրա շրջանակներում նկարված բոլոր լուսանկարները ջրի տակ են նկարվել: Այդ լուսանկարներում արտացոլված է անօգնականության զգացումը, որով մարդ համակվում է այն ժամանակ, երբ չի կարողանում ազատ շնչել: Դրանցում կարելի է տեսնել, թե ինչպես են մարդիկ ճիգ գործադրում՝ շունչը մի քանի վայրկյան ավել պահելու համար: Այս ամենն այնքան վառ ու տպավորիչ կերպով է ներկայացված նախագծի շրջանակներում, որ դիտողների շունչը ևս սկսում է կտրվել այդ լուսանկարներին նայելիս: Այդ ստորջրյա լուսանկարներում պատկերված է պայքարը մարդկանց ու ջրի ալիքների միջև: Նախագծի գաղափարը Մարկ Թիպլի գլխում հանկարծակի է ծագել: Ահա թե ինչ է պատմել նա «Ստորջրյա նախագծի» մասին իր հարցազրույցներից մեկում.
«2009 թ.-ի դեկտեմբերի 17-ին ես լուսանկարում էի Ավստրալիայի Սիդնեյ քաղաքի Քուգի լողափի ալիքները: Սկզբում ալիքները հանդարտ էին, սակայն աստիճանաբար ջուրը սկսեց ալեկոծվել: Ալիքներն ինձ իրենց գիրկն առան: Ես սուզվեցի ջրի մեջ, ու այդ պահին մտածեցի, որ պետք է թույլ տալ, որ տեսախցիկն էլ ինձ հետ միասին լող տա ջրի տակ: Ես սեղմեցի տեսախցիկի համապատասխան կոճակը, և այդ պահին ծնվեց իմ առաջին ստորջրյա լուսանկարը, որն անվանվեց «Փախուստ»: Այդ պահից ի վեր ես փոխեցի իմ լուսանկարչական ուղղությունը և տարվեցի «Ստորջրյա նախագիծ» անվանումը կրող շարունակական նախագծի իրականացմամբ:
