Royal Bank of Scotland-ը, կամ (RBS)-ն շատ լուրջ խնդիրներ ուներ, քանի որ փոքր ու միջին բիզնեսի ներկայացուցիչներից բազմաթիվ բողոքներ էր ստանում վատ սպասարկելու համար: Որպեսզի բանկը շահի հաճախորդների վստահությունը, ներդնում է այնպիսի մի ծրագիր, որը կոչվում է “Լինել հաճախորդին ավելի մոտ” : Իսկ գիտե՞ք, թե ինչն էր հետաքրքիր, այն, որ բանկի աշխատակիցը երկու օր աշխատում է հաճախորդի մոտ ու անվճար:
Օրինակ` Կորպորատիվ հաճախորդների բաժնի պետ` Ադրիան Իդին, Լոնդոնի հյուսիսային թաղամասերից մեկում պանիր էր բարձում, մեկ այլ ժամանակ նույն Իդին մաքրում էր ինչ-որ ռեստորանի սեղանները, օն-լայն բանկինգի ղեկավար Իեն Կոուին էլ աղբ էր թափում Լոնդոնի ծայրամասային թաղամասերից մեկում, մեկ այլ բաժնի ղեկավար սայլակով քարեր էր կրում:
Այս բոլոր բանկիրներն աշխատանքները կատարում են իրենց իսկ ցանկությամբ, որը RBS-ը նախագծել էր` ի պատասխան փոքր ու միջին բիզնեսի ներկայացուցիչների բողոքների: Բոլոր բանկիրները, որոնք աշխատում են կորպորատիվ հաճախորդների հետ, պարտավոր էին տարվա մեջ երկու օր աշխատել հաճախորդի ենթակայության տակ և կատարել նրա հանձնարարությունները: Ինչպես ասում է Ադրիան Իդին, իրենք անգամ հաճախորդի համար թեյ են պատրաստել:
Նման քայլն ուներ իր պարզ նպատակը` բանկիրները պետք է բիզնեսին նայեն հաճախորդի տեսանկյունից: Ոչ մի աշխատակից չէր վճարվում ու ոչ մի վճար չէր վերցնում, քանի որ դա բանկի քաղաքականությունն է: Հավատացեք, նման մոտեցումից ոչ միայն բողոքներն էին կրճատվել, այլ նաև ավելացել էր փոքր ու միջին բիզնեսի վարկավորումը:
Նման երևույթ Հայաստանում հնարավոր չէ, բայց կարծում եմ շատ հետաքրքիր կլիներ կիրառել նաև մեր երկրում:
