Եկեք դաստիարակենք կոմունիզմի գործին անվերապահորեն նվիրված սերունդ
Վիկտոր Իվանով, 1947
Խորհրդային քարոզչության պաստառներն առաջին անգամ հայտնվեցին այն բանից հետո, երբ հաջողությամբ պսակվեց ռուսական հեղափոխությունը: Դրանք օգտագործվում էին հեղափոխությունը առաջ տանելու, նոր հասարակության հանդեպ լավատեսական տրամադրություն ստեղծելու և Լենինի կառավարության հակառակորդներին ահաբեկելու համար: Այդ ժամանակ շատ քիչ ամսագրեր էին հրատարակվում, և հենց այդ պատճառով պաստառները ծառայում էին իբրև հաղորդակցման գլխավոր միջոց: Ռուսական հեղափոխության ժամանակ մարդկանց զգուշացնում էին, որ ցանկացած մարդ, ով կպատռի կամ կջնջի այս պաստառը, հակահեղափոխական արարք է գործում:
1930-ականներին, երբ իշխանության գլուխ էր անցել Ստալինը, այս պաստառների շեշտը ավելի շատ քաղաքական կարգապահության վրա էր, ինչպես նաև կառավարական ամբիցիոզ ծրագրերի՝ մասնավորապես հողի կոլեկտիվացման վրա: Հետագայում շատերը ստեղծեցին վառ գույների ու բազմաբնույթ ձևերի հզոր և դինամիկ պաստառներ: Այնուամենայնիվ, հետագայում դրանց փոխարինելու եկան իրատեսական նկարներով պաստառները: Ամենուրեք կարելի էր տեսնել Կարմիր աստղը՝ Կարմիր բանակի խորհրդանիշը: Նույնը կարելի է ասել և մանգաղի ու մուրճի մասին: Երկրորդ համաշխարհային պատերազմի ողջ ժամանակ այս պաստառները փակցված էին ամենուրեք: Դրանց օգնությամբ իշխանությունը ձգտում էր համոզել մարդկանց նպաստել Խորհրդային Միության վարած քաղաքականությանը, ծառայել բանակում և բարոյականության ոգով դաստիարակել քաղաքացիներին:
Ջախջախենք դրան
Վիկտոր Դենի, 1930
Այս պաստառը գործածվել է դարի առաջին կեսին՝ երկրում արմատացած սոցիալական և մշակութային բացասական երևույթները արմատախիլ անելու համար: Պաստառում պատկերված է, թե ինչպես է մի մարդ կոտրում ալկոհոլի շիշը մի մուրճով, որի վրա փորագրված է «ՄՇԱԿՈՒԹԱՅԻՆ ՀԵՂԱՓՈԽՈՒԹՅՈՒՆ»: Այս պաստառի ստեղծման ժամանակաշրջանում ալկոհոլը համարվում էր հեղափոխության ոխերիմ թշնամին: Պաստառի տակ նաև մի բանաստեղծություն է գրված:
Հեյ դուք, ալկոհոլի հետ կատակ չանեք,
Ավելի լավ է այն ջախջախել շեշտակի,
Ջախջախել ողջ ուժով,
Ջախջախել ամեն օր, ամեն քայլափոխի,
Ջախջախել ողջ ցասումով,
Թշնամուն հանգիստ մի՛ տվեք:
Դու զինվորագրվե՞լ ես
Դմիտրի Մուր
Ռուս աշխատավորների աջակցությունը շահելու համար այս հայտնի պաստառի վրա օգտագործվեց Կարմիր բանակի զինվորի նկարը: Զինվորը շեշտակի հարցնում է դիտողներին, թե արդյո՞ք նրանք նվիրված են հեղափոխություն իրականացնելու գաղափարին:
Բերանդ փա՛կ պահիր
Նինա Վատոլինա, 1941
Սա երկրորդ համաշխարհային պատերազմի ամենահայտնի պաստառներից մեկն է: Դրա հեղինակը՝ Նինա Վատոլինան, ստեղծել է այս պաստառը բամբասելու վտանգավորության մասին զգուշացնելու համար: Պաստառի բանաստեղծությունը գրվել է Խորհրդային Միության բանաստեղծ Սամուլի Մարշակի կողմից: Ստորև կարող եք կարդալ բանաստեղծության հայերեն թարգմանությունը.
Զգո՛ն եղիր:
Մեր օրերում անգամ պատերն ականջներ ունեն:
Շատախոսությունից ու բամբասանքից դեպի դավաճանություն մի քայլ է:
Պաշտպանենք ԽՍՀՄ-ը
Վալենտինա Կուլագինա, 1930
Այս հասարակ, սակայն միաժամանակ ապշեցուցիչ ու գունագեղ պաստառը ստեղծվել է 20-րդ դարի ամենանշանավոր նկարչուհիներից մեկի՝ Վալենտինա Կուլագինայի կողմից:
Մայր հայրենիքն է կանչում
Իրակլի Տոիդզե
Այս պաստառը լայնորեն տարածվեց երկրորդ համաշխարհային պատերազմի ժամանակաշրջանում: Պաստառի միջոցով քաղաքացիներին կոչ էին անում իրենց երկրի առաջ իրենց պարտքը կատարել:
Հանուն հայրենիքի
Ալեքսեյ Կոկորեկին
Ալեքսեյ Կոկորեկինի «Հանուն հայրենիքի» պաստառի վրա պատկերված է ծանր վիրավորված մի նավաստի, ով հակատանկային նռնակ է նետում իր հակառակորդների ուղղությամբ: Սա ևս արվեստի ազդեցիկ ստեղծագործություն է, որը միտված է հայրենասիրության զգացում ծնել Խորհրդային Միության քաղաքացիների շրջանում:
Կարմիր բանակի զինվո՛ր, փրկի՛ր մեզ
Վիկտոր Կորետսկի
Պատերազմի առաջին մասը ԽՍՀՄ-ի համար կատաղի էր: Սա ընդգծված է Վիկտոր Կորետսկիի պաստառում, որտեղ պատկերված է, թե ինչպես է մի նացիստ իր արյունոտ սվինն ուղղել երեխային գրկած մոր վրա: Պաստառի հետին պլանում կրակ է նշմարվում:
Կոմունիզմի երիտասա՛րդ կառուցողներ
Սա վաղ շրջանի այն պաստառներից է, որոնց շնորհիվ պրոպագանդվում էր կոմունիզմն ու կրթությունը: Պաստառի վրա գրված է. «Կոմունիզմի երիտասա՛րդ կառուցողներ, առա՛ջ դեպի աշխատանքային ու կրթական նոր ձեռքբերումներ»:
