1in.am-ը գրում է.
Բելգիայում ցույց է անցկացվել ընդդեմ անչափահասների համար էֆթանազիայի հնարավորության մասին օրինագծի ընդունման: Մեծահասակների համար էֆթանազիան Բելգիայում թույլատրվում է 2002 թվականից: Ինչպես հայտնում է Associated Press-ը, օրինագծի շուրջ քվեարկությունը կանցկացվի հիգշաբթի՝ Ներկայացուցիչների պալատում:
Օրենքն արդեն հավանության է արժանացվել Սենատի կողմից: Գրեթե ոչ ոք կասկած չունի դրա ընդունման վերաբերյալ:
Այսպիսով՝ Բելգիան կդառնա անչափահասների համար էֆթանազիա թույլատրող երկրորդ երկիրը Նիդերլանդներից հետո: Հոլանդիայում հիվանդի խնդրանքով մահվան միտումնավոր արագացումն օրինական է 12 տարեկանից բարձր անձանց համար, իսկ բելգիական օրինագծում նվազագույն տարիք նշված չէ:
Ինչպես ասվում է օրինագծի տեքստում, էֆթանազիան կթույլատրվի այն անչափահասներին, ովքեր ունակ են ինքնուրույն որոշումներ ընդունել և գտնվում են հիվանդության տերմինալ փուլում: Որոշումը չի կարող ընդունվել առանց ծնողների համաձայնության, ինչպես նաև բժիշկների, հոգեբանի և հոգեբույժի խորհրդի:
