Բրազիլիայի լավագույն ոստիկաններից մեկը, ով իրական մաչո էր համարվում, ապշեցրել էր իր կոլեգաներին՝ արձակուրդից վերադառնալով սեքսուալ սևահեր կնոջ կերպարանքով:
33-ամյա Տիագո դե Կոստա Տեյշեյրան, ով ղեկավարում էր թմրանյութերի դեմ պայքարի բաժինը, 3 ամիս տևողությամբ արձակուրդ էր վերցրել, որպեսզի Թաիլանդում սեռափոխության վիրահատություն կատարեր, որից հետո վերադարձել էր նախկին աշխատանքին՝ որպես Լորա անունով կին: Ոստիկանության ղեկավարությունը գնահատեց ոստիկանի համարձակությունը: Նաև, դա միակ դեպքն էր, երբ սեռը փոխած անձնավորությունը չհեռացվեց աշխատանքից:
Տեյշեյրան, ով նախկինում ամուսնացած էր և երկու փոքր որդիներ ուներ, ոչ միայն սեռափոխության վիրահատության ենթարկվեց, այլև մի շարք պլաստիկ վիրահատություններ կատարեց՝ ավելի մեղմ և նուրբ դիմագծեր ստանալու համար: Ինչպես նշում է Mail Online-ը Տեյշեյրան, լինելով օրենքի ծառայող, նա բոլոր պրոցեդուրաներն օրենքի սահմաններում է իրականացրել:
«Ես միշտ ցանկանում էի կին դառնալ, բայց ամաչում էի դա խոստովանել: Ի վերջո, ես այլևս չկարողացա թաքցնել իմ իրական բնույթը: Սկզբում ես մտահոգված էի, թե ինչպես կարձագանքեն իմ կոլեգաները, սակայն մինչ օրս նրանց հետ ոչ մի խնդիր չեմ ունեցել»,- ասում է ոստիկանը:
Քաղաքային ոստիկանության ղեկավարության խոսքերով՝ Տեյշեյրայի որոշումը քաջարի արարք է:
«Մեզ համար այդ վիրահատությունը խնդիր չէ: Մենք մտահոգված ենք կաշառակերության, բռնության դեմ պայքարով»,- ասել է ավագ օֆիցերը:
Սակայն, մի քանի օֆիցերներ զգուշացրել էին, որ չնայած ղեկավարության աջակցության, Լորան կարող է խնդիրներ ունենալ կոլեգաների հետ:
Շատերը զարմացած են Տեյշեյրայի սեռափոխությամբ և ավելցանում են. «Նա այն տղաներից չէր, ում նայելով, անգամ մտքի ծայրով կարող էիր մտածել, որ նա կարող է փոխել սեռը»:
Բրազիլիայում համասեռամոլների դեմ բռնության աստիճանը խիստ բարձր է և, պետական վիճակագրական տվյալներով, 2012-2013թ.-ում համասեռամոլների հանդեպ բռնությունը աճել էր ավելի քան երկու անգամ:
Տեյշեյրան պատրաստվում է դիմել ոստիկանական ղեկավարությանը՝ իրեն կանանց դեմ բռնության բաժին տեղափոխելու համար:
