1in.am-ը գրում է.
France 3 TV ֆրանսիական հեռուստաալիքը հրապարակել է Լիբիայի նախկին առաջնորդ Մուամար Քադաֆիի վերջին հարցազրույցներից մեկը, որում նա հաստատել է, որ Լիբիան 2007թ. ֆինանսավորել է Նիկոլա Սարկոզիի նախընտրական քարոզարշավը:
Հարցազրույցն արվել է 2011թ. մարտի 16-ին՝ այն բանից մի քանի օր անց, երբ Ֆրանսիան պաշտոնապես ճանաչեց լիբիական ընդդիմությանը, որը փորձում են տապալել Քադաֆիին:
Քադաֆին հայտարարել է, որ Սարկոզին օգնության խնդրանքով դիմել է իրեն, երբ եղել է ՆԳ նախարար: Միաժամանակ նա չի հստակեցրել գումարը, որը նա վերջին հաշվով փոխանցել է ֆրանսիացի քաղաքական գործչին:
«Սարկոզին մտավոր հետամնաց է... Միայն իմ շնորհիվ նա դարձավ նախագահ... Մենք նրան միջոցներ տրամադրեցինք, որոնք օգնեցին նրան հաղթել»,- մեջբերում է France 24 հեռուստաալիքը Քադաֆիի հայտարարությունը:
Հիշեցնենք, որ Քադաֆիի կողմից Սարկոզիին ցուցաբերված հավանական ֆինանսական աջակցության շուրջ սկանդալը ծագեց 2012թ. գարնանը, երբ ֆրանսիական Mediapart պարբերականը հրապարակեց փաստաթղթեր, որոնց համաձայն՝ լիբիական վարչակարգն իբրև թե 50 միլիոն եվրո է տվել Սարկոզիին նախագահական ընտրություններում քարոզարշավի համար:
