Նոր եռակողմ սկանդալ է հասունանում, որում կարող են ներգրավվել Սպորտի և երիտասարդության հարցերի նախարար Յուրի Վարդանյանն ու ՀՖՖ նախագահ Ռուբեն Հայրապետյանը՝ մի կողմից և ՀԱՕԿ նախագահ Գագիկ Ծառուկյանը՝ մյուս կողմից:
Պատճառ կարող է դառնալ «Արարատ 73» լեգենդար ակումբի ֆուտբոլիստների արձանի հարցը: Բանն այն է, որ ակումբի 40-ամյակի կապակցությամբ արդեն ծերացած ֆուտբոլիստները սկզբում դիմել են Յուրի Վարդանյանին, որպեսզի «Արարատ 73»-ի պատվին արձան կանգնեցվի, և նախարարը չի մերժել, սակայն փաստացի այս պահի դրությամբ ոչինչ չի արվել:
Փոխարենը, ինչ-որ բան արել է Գագիկ Ծառուկյանը, ով իրեն դիմելուց անմիջապես հետո հավանություն է տվել գաղափարին, և արձանի նախագծերի մրցույթ է հայտարարել, որում հաղթող նախագիծը կպատվիրվի, իսկ հեղինակը կստանա խոշոր դրամական մրցանակ:
Սակայն, արի ու տես, որ գործը կարող են հարամել նախարարությունն ու Նեմեցը, որովհետև Վարդանյանն էլ, Նեմեցն էլ յոլլա չեն գնում Ծառուկյանի հետ, իսկ առանձին դեպքերում ակնհայտ չուզողություն են անում: Հիմա էլ մեծ հավանակնություն կա, որ թույլ չեն տա, որպեսզի արձանը կանգնեցվի Ծառուկյանի միջոցներով:
Բնականաբար, հարց է առաջանում. եթե՞ այդքան չեք ուզում, որ Ծառուկյանի փողերով արձանը տեղադրվի, ապա ինչո՞ւ ինքներդ ֆինանսավորման աղբյուր չեք փորձում գտնել այդ նախագծի համար...
