1in.am-ը գրում է.
Ֆրանսիայի խորհրդարանն այսօր քննում է մեծ աղմուկ բարձրացրած օրինագիծը, համաձայն որի՝ սեքսը մարմնավաճառի հետ կհամարվի հանցագործություն՝ գրում է The Times-ը:
Հոդվածագիր Ադամ Սեյջը նշում է, որ Ֆրանսիայի նախագահ Ֆրանսուա Օլանդի աջակցությունը ստացած նոր օրինագծին դեմ են արտահայտվել Մարմնավաճառների ասոցիացիան, մտավորականները, ովքեր դատապարտել են նման հարձակումը սեռական ազատության վրա: Դատապարտող կողմին միացել է նաև դերասանուհի Կատրին Դենյովը: Նա ստորագրել է միջնորդագիրը, որում ասվում է, որ այդ միջոցառումը մարմնավաճառությունն ընդհատակ կտանի:
Օրինագիծը հայտնվել է այլ եվրոպական երկրների կողմից հակառակ ուղղությամբ իրականացվող քայլերի ֆոնին: Իսպանիան, Գերմանիան և Շվեյցարիան փորձեր են ձեռնարկում կարգավորելու, սակայն ոչ արգելելու մարմնավաճառությունը:
Համաձայն ֆրանսիական օրինագծի՝ մարմնավաճառի հետ սեքսը կպատժվի 1500 եվրո տուգանքով:
Դատարանը կպարտավորեցնի օրինախախտին նաև այցելել հատուկ դասընթացների՝ ուղղված մարմնավաճառության հետ կապված խնդիրների մասին իրազեկվածության բարձրացմանը:
Վիճակագրությունը փաստում է, որ Ֆրանսիայի մարմնավաճառների 90 տոկոսը ծագումով այլ երկրներից են, մասնավորապես՝ Ռումինիայից, Բուլղարիայից, Նիգերիայից, Բրազիլիայից և Չինաստանից: