1in.am-ը գրում է.
Իրանի խորհրդարանի 50 պատգամավորներ որպես առաջնահերթ հարց՝ պահանջել են քննարկել Իրանի քաղաքական մայրաքաղաքը Թեհրանից տեղափոխելու հարցը: Այս մասին է ասել խորհրդարանի իրավաբանական հանձնաժողովի անդամ Աբուլֆազլ Աբուտուրաբին՝ հաղորդում է Fars գործակալությունը:
Աբուտուրաբին նշել է, որ եթե քննարկվող ծրագիրը հաստատվի, ապա 14 հոգուց բաղկացած աշխատանքային խումբը՝ նախագահի ղեկավարությամբ, բազմակողմանիորեն կուսումնասիրի մայրաքաղաքի տեղափոխման հարցը և մեկ տարի անց խորհրդարանին կներկայացնի ուսումնասիրության արդյունքները:
Նշվում է, որ հաշվի առնելով Թեհրանի բնակչության արագ աճը և այն, որ քաղաքը տեղակայված է սեյսմիկ ակտիվ գոտում, ներկայացվել են մայրաքաղաքը տեղափոխելու առաջարկներ: Պաշտոնական տվյալներով՝ ներկա պահին Թեհրանում ապրում է 12-13 միլիոն մարդ:
Առայժմ հայտնի չէ, թե որտեղ կտեղափոխվի մայրաքաղաքը: