1in.am-ը գրում է.
Forbes-ի գլխավոր խմբագիր Մայքլ Նորմը հայտնել է պատճառների մասին, որոնք կարող են հիմք դարձած լինել ամերիկյան ամսագրի փորձագետների համար՝ ընտրելու Պուտինին աշխարհի ամենաազդեցիկների վարկանիշի առաջին հորիզոնականում:
«Չեմ կարող հստակ ասել, թե ինչու է հենց Պուտինը դարձել առաջինը: Դա փորձագետների կոլեկտիվ կարծիքն է, սակայն կարող եմ ենթադրել, որ որոշումն ընդունվել է ԱՄՆ-ում բյուջետային ճգնաժամի թեժ պահին»,- ասել է Նորմը «Ռոսիա 24»-ի հետ հարցազրույցում:
Նա նաև նշել է, որ ԱՄՆ նախագահը չի կարողացել նախաձեռնությամբ հանդես գալ, երբ աշխարհում սկանդալ է հասունացել ամերիկյան հետախուզության գործողությունների շուրջ, մինչդեռ Վլադիմիր Պուտինը միջազգային դաշտում գործում է վճռականորեն: Այս տարի նա առանցքային դեր է խաղացել սիրիական հարցի կարգավորման գործում: Նրա կարծիքով՝ հենց այդ պատճառով էլ փորձագետների ընտրությունը կանգ է առել Ռուսաստանի նախագահի վրա:
Նորմի խոսքով՝ վարկանիշը կազմվել է պարբերականի 8 լրագրողների քվեարկության հիման վրա: Գնահատվել է 150 թեկնածություն:
Հիշեցնենք, որ վերջին երկու տարիներին վարկանիշը գլխավորել է Օբաման: