ՀՀԿ գործադիր մարմնի եւ խորհրդի նիստում սպորտի եւ երիտասարդության նախարարի պաշտոնում առաջադրվել է լեգենդար մարզիկ, ներկայումս ՀՀ նախագահի խորհրդական Յուրի Վարդանյանը: Այս մասին այսօր` մայիսի 7-ին, ՀՀԿ գործադիր մարմնի եւ խորհրդի նիստից հետո ասաց ԱԺ փոխնախագահ Էդուարդ Շարմազանովը եւ համոզմունք հայտնեց, որ ինչպես 1980-ականներին ենք մեծ նվաճումներ ունեցել, այնպես էլ հիմա ենք ունենալու:
ՀՀԿ գործադիր մարմնի եւ խորհրդի նիստի օրակարգում, ամփոփելով ավագանու ընտրությունները, դրական են գնահատել ընթացքն ու ամփոփումը:
Ինչ վերաբերում է կառավարության կազմի ձեւավորմանը, վարչապետի առաջարկությամբ գործադիր մարմնի եւ խորհրդի միաձայն քվեարկությամբ որոշվել է կառավարության աշխատակազմի ղեկավարին օժտել նաեւ նախարարի գործառույթով: Այդ պաշտոնում առաջարկվել է նշանակել Վաչե Գաբրիելյանին:
Ֆինանսների նախարարի պաշտոնում առաջարկել են Դավիթ Սարգսյանի թեկնածությունը: Էկոնոմիկայի նախարարի պաշտոնում առաջադրել են միջազգային հայտնի փորձագետ, նախկին նախարար Վահրամ Ավանեսյանի թեկնածությունը, իսկ ներկայումս էկոնոմիկայի նախարարի պաշտոնակատար Տիգրան Դավթյանը որպես ՀՀԿ-ի ներկայացուցիչ կծառայի այլ ոլորտում:
Մնացած բոլոր նախարարները կմնան իրենց պաշտոններում:
Իսկ փոխվարչապետի եւ տարածքային կառավարման նախարարի պաշտոնում կվերանշանակվի Արմեն Գեւորգյանը:
Այլ հարցեր չեն քննարկել:
ՕԵԿ-ի երեք պորտֆելները կպահպանվեն, եւ նրանք պետք է ներկայացնեն կազմը:
Աղբյուրը՝ News.am
