Եթե մտովի պատառոտում ես շապիկդ, հայելու մեջ չես նայում, որովհետև գիտես, որ ցանկացած սարսափ ֆիլմում երանելի կերպար կլինես, եթե շրջապատող ամեն ինչ ուղարկում ես "գրողի ծոցը", կամ փշոտել ես մացառախոզի/дикобраз/ պես, նշանակում է քեզ դանդաղ կուլ է տալիս ԱՆՈՐՈՇՈՒԹՅՈՒՆԸ:
Սա սղոցում է մեր նյարդերը, բայց դարձնում ավելի դիմացկուն, չափում է մեր համբերությունը` մարզելով այն, նրա պատճառով վատնում ենք մեզ համար այդքան թանկ ժամանակը:
Անորոշություն կարող է լինել ցանկացած երևույթում:Սպասվելիք որևէ բանի դեպքում մենք օրական 10անգամ ստուգում ենք մեր էլեկտրոնային փոստը, հեռախոսը ձեռքում շնչում-արտաշնչում:Այն մարդու նկատմամբ , ով մեզ պատանդ է վերցրել իր անորոշությամբ, ցուցաբերում ենք հրեշտակային վերաբերմունք` ատամները պինդ սեղմած, սակայն պատրաստ հոշոտելու նրան:
Իսկ ինչպես դիմակայել անորոշությանը?
- Մարզում ենք ուղեղը, տանում նրան ուրիշ ուղղությամբ, ֆիլմեր դիտում, գրքեր կարդում, սկսում ուսումնասիրել մոռացված գիտություններ, վերցնում ավագ դասարանի կենսաբանության դասագիրք ու խճճվում տերմինների մեջ:Հիշում թե մաթեմատիկայի որ խնդիրներից էինք մենք կաղում ցածր դասարաններում ու սկսում կազմել նմանատիպ առաջադրանքներ:
- Եթե վերոհիշյալ գործողությունները ավելի են նյարդայնացնում, կարելի է փոխել միջավայրը:Կարելի է որևէ տեղ գնալ:Որևէ կորած-մոլորած գյուղ:Որպեսզի տան անդամների վրա չթողնեք խելագարի տպավորություն, ասեք, որ ձեզ սկսել են հետաքրքրել պատմամշակութայի վայրերը:Մոլորված գյուղը կստիպի ավելի պրիմիտիվ ու հանգիստ կերպով նայել ամեն ինչի:
- Եթե սա էլ ձեր դեպքը չի, քնաբեր ընդունեք և քնեք:Արթնանալուց հետո փորձեք նախորդ երկուսը:/կատակ էր/
- Եթե կրծոտում եք ձեր եղունգները և կռճտացնում ատամները անորոշությունից, մի բան էլ ձեռնարկեք մազերի վերաբերյալ:Օրինակ կարելի է չոլկան կտրել արմատից, հիմա նման անփույթ սանրվածքները չափազանց նորաձև են:Կարծում եմ, որ շատ արագ կզղջաք ձեր արածի համար և կհասկանաք, որ անրոշությունը չնչին բան էր ֆիզիկական վնասի դիմաց:
- Եթե համբերությունը հատել է, գրքեք որևէ բարձ, և լացեք:Բարձը ցանկալի է ձերըլինի, որպեսզի հետագայում ավելի սթափ վիճակում հասկանաք, որ չարժեր նման աննշան բանի պատճառով ողբ կապել սեփական բարձի վրա:
- Եթե ֆինանսապես կայացած եք, նվիրեք ձեզ մի ամբողջ օր իր բոլոր վայելքներով:Ընդուպ մինչև հարբելը որևէ ակումբում կամ բարում:Սկսեք շոփինգից, հետո այցելեք մարզասրահ կամ լողավազան, չմոռանաք մերսվել ամրակազմ ջիգիթի կողմից, հետո զբոսնեք, իսկ երեկոյան` վերը նշվածը պարտադիր է:
- Դեռ չեք մոռացել անորոշության մասին, տրվեք երաժշտությանը:Սկսեք դասականից, բայց եթե նրա ներքո լսվում է ձեր անհանգիստ քունքերի տկտկոցն ու սրտի զարկերը, խլացրեք դրանք ռոքով:Չմոռանաք երգչի իմիտացիան անել: Տան անդամներին ուղարկում ենք հարևանի տուն սուրճ խմելու` անկախ նրանից տանը մարդ կլինի թե ոչ և որքան հնարավոր է, նույնիսկ կարելի է բարձր ձայնով գերազանցել երգչին: Հավատացած եղեք ամբողջ նեգատիվն ու անհամբերությունը, որ կուտակվել էր ձեր մեջ, միանգամից հօդս կցնդի:
- Եթե անորոշությանը պատասխանվում է անորոշությամբ, դա կարող է հակառակ էֆեկտը ունենալ:Այն կօգնի մեզ դառնալ անտարբեր երևույթի նկատմամբ:Անորոշությունը կկորցնի իր անզուգականությունը, ժամանակի ընթացքում կմոռացվի:
- Եթե մեր անորոշությունը չի ուզում որևէ կերպ իր տեղը զիջել հանգստությանը, զանգում ենք մոտիկ ընկերոջը կամ ընկերուհուն ու սկսում դարդախեղդ լինել:Եթե փոքր ինչ հավասարակշիռ է ընկերուհին, կարող է ձեզ այդ վիճակից դուրս հանել, եթե ավելի զգայուն կերպար է, փաստորեն դուք պետք է հուսադրեք նրան:Դա օգտակար կլինի այնքանով, որ դուք կհասկանանք , թե ինչքան ուժեղ եք դուք, իսկ անորոշությունը իրականում ոչինչ է համեմատած լուրջ խնդիրների հետ:
Նյութի աղբյուր՝ http://hasmik-77.blogspot.com/2012/06/blog-post_30.html
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել