«Քիթ-Cut»՝ տրագիկոմեդիա, որի մասին ArmStar.am-ն առաջինն է պատմել իր ընթերցողին:
Ինչպես հիշում եք, մենք խոստացել էինք, որ պարբերաբար կներկայացնենք հրապարակումներ մինչ ներկայացման պրեմիերան, իսկ պրեմիերային հաշված օրեր են մնացել:
Դերասաններ Անդրանիկ Հարությունյանը, Կարապետ Բալյանը և Լիլի Միքայելյանը մայիսի 26-ին Կամերային թատրոնում առաջին անգամ կներկայացնեն 2080 թվականը, երբ ժամանակի հերոսները կանգնած կլինեն ընտրության առջև՝ կտրել հայի քիթը, թե՞ ոչ:
«Ներկայացման մեջ մի շատ կարևոր խնդրի մասին ենք բարձրաձայնելու, խոսքը հայի գենը պահպանելու մասին է: Ներկայացվելու է 2080 թվականը, երբ վտանգված է հայի գենը: Ես մարմնավորելու եմ այնպիսի կերպար, ով քթի հարկ մուծելուց այնքան է հոգնել, որ նախընտրում է կտրել իր քիթը և ազատվել հարկից ու նորմալ բարեկեցիկ կյանքով ապրել»,- ասում է դերասան Անդրանիկ Հարությունյանը, ով մարմնավորելու է Անդոյի կերպարը:
Աշխարհն առաջ է ընթանում, իսկ այդ ընթացքից հետ են մնացել երկու հոգի, ովքեր, պետությանը հարկ վճարելով, չեն կարողանում հոգալ իրենց կարիքները:
«Օրինակ` Կարոն, ով հայրենասեր է, իր համար կարողանում է ռոբոտ գնել, իսկ ես այնքան գումար եմ մուծում, որ չեմ կարող ինձ նման շքեղություն թույլ տալ: Շուտով երկուսիս միջև այդ տարձայնություններն են սկսում սկիզբ առնել, իսկ թե ինչպես է գալիս դեպի վերջնակետ, դա ամենաանսպասելին է»,- ArmStar.am-ի հետ զրույցում նշում է դերասանը:
Անդրանիկ Հարությունյանի խոսքով` ներկայացումը լինելու է Կամերային թատրոնի ոճի մեջ: Ինչպես միշտ, հանդիսատեսին իրականությունը կհասնի ծիծաղի միջոցով:
«Հանդիսատեսը գալիս նայում է մեր ներկայացումները, ծիծաղում, լավ ժամանակ է անցկացնում, բայց երբ դուրս է գալիս թատրոնից, սկսում է մտածել, որ ինչ-որ բան կիսատ է մնացել իր ներսում: Մենք այնպիսի թեմաներ ենք ընտրում, որ հանդիսատեսն իրականությունը տեսնի, զգա և սկսի խորհել դրա մասին: Նա ներկայացումը տեսնելուց հետո սկսում է մտածել, որ ծիծաղում էր իր վրա: Այս ներկայացման նպատակը ևս ծիծաղի միջոցով հանդիսատեսի ուշադրությունը սևեռելն է մի շարք հարցերի վրա, որի համար ժամանակն է, որ անհանգստանանք»:
Շարունակությունն՝ այստեղ