1in.am-ը գրում է.
«Առաջին լրատվական»-ի զրուցակիցն է «Նոր քաղաքական մշակույթ» կուսակցության (ՀՆՔՄԿ) ղեկավար Անի Զախարյանը:
- Օրերս ասուլիսին Ձեր՝ 26 տարեկանը բոլորած աղջիկներին կուսությունից զրկվելու կոչից հետո հանրության մոտ սկսվել են տարբեր քննարկումներ: Տեսակետ կա, որ այդ հարցը փորձում են քաղաքականացնել` կարևոր իրադարձություններից շեղելու համար: Ձեր կողմից հնչեցրած կոչի նպատակը ո՞րն է:
- Բացարձակապես այս թեման միտում չունեի շահարկելու: Այս թեմայով զրույցը և այս հարցի պատասխանը տվեցի միայն լրագրողներից մեկի առաջ քաշած թեմայից հետո, բայց բոլորը գիտեն, որ այդ օրվա մամուլի ասուլիսը նվիրված էր Կոմիտաս 5-ի իրադարձություններին: Ինչպես այդ ժամանակ նշել էի, փաստաթղթերը ինձ մոտ են և պետք է դրվեն Ճարտարապետների միության խորհրդի դատին: Արդեն դրվել են, և հիմա ես սպասում եմ իրենց մասնագիտական խորհրդի եզրակացությանը: Ինչ վերաբերում է մամուլի ասուլիսին հնչեցրած մտքերի շահարկումներին, լսում էի «Ղարաբաղ» կոմիտեի ղեկավարի՝ Ազատության հրապարակում հնչեցրած մտքերը, որ սա էգերի կուսակցություն է, որ իբր ես հայ կանանց կովերի հետ եմ համեմատել, բայց նման բան չկա: Այստեղից կարող եմ մեկ եզրակացության գալ, որ իրենք շատ լավ հասկանում են, որ Հայաստանում նոր քաղաքական մշակույթ է ձևավորվում, և կա մեկը, ով քաղաքական լուրջ եղանակ փոխելու միտում և մտադրություն ունի: Բնականաբար, այդ ամենը միանգամից կասեցնելու համար հարմար առիթ է ստեղծվում, շահարկվում է, բայց որևէ նպատակի չեն հասնելու, քանի որ այն ազգային գիտակցումը, որ ես մտցնելու եմ Հայաստան, այն հայրենասիրական մղումները, այն տնտեսական ծրագրերով հիմնավորված քաղաքականությունը, որ Հայաստանի նոր քաղաքական մշակույթը պետք է ներմուծվի Հայաստան, բոլոր չարախոսներին լռեցնելու, բոլոր բամբասանքներին վերջ է տալու:
- Ուզում եք ասել` մինչև հիմա մենք կին քաղաքական գործիչների մասին այլ պատկերացում ունեինք, հիմա Դուք կնոջ նո՞ր տեսակ եք բերելու քաղաքականություն:
- Եթե մենք հայացք նետենք և մեր անցյալի քաղաքական իրականությունը վերլուծենք, կտեսնենք, որ իսկապես լուրջ քաղաքական գործիչներ Հայաստանում չենք ունեցել: Իհարկե, կարող ենք բերել սփյուռքի նախարարի օրինակը, ով լայնածավալ աշխատանք է իրականացրել, բայց Հայաստանի ներքին և արտաքին քաղաքականության մեջ լուրջ փոփոխություններ մտցնելուն միտված այդպիսի կին գործիչ մենք չենք ունեցել: Գտնում եմ, որ կապ չունի կին է թե տղամարդ, ազգային գիտակցությունն է, որ մարդուն պետք է մղի իր երկրի նկատմամբ ունեցած սրտացավությանը, մարդուն պետք է մղի քաղաքականությամբ զբաղվելուն: Քաղաքականությամբ ինքնանպատակ չեն զբաղվում: Քաղաքական գործչի և առավել ևս կին քաղաքական գործչի տեսակը պետք է լինի առաջին հերթին՝ կանանց շահերը պաշտպանելը: Այդպես ենք գնալու առաջ, որովհետև այսօր նույն ԱԺ-ում, պետական կառույցներում, երբ ցանկանում են կնոջը լռեցնել, առաջին ազդակը, որ փորձում են կնոջը լռեցնել՝ արժանապատվությանը և ինքնասիրությանը դիպչելն է, իսկ մենք գիտենք՝ կինը ինչպիսի էակ է: Հայ կանայք, ովքեր իսկապես ցավում են հայրենիքի համար, ովքեր գտնում են, որ այս ամենում լուրջ դերակատարություն ունեն, պետք է համարձակորեն մի կողմ նետեն բոլոր ընդունված չափորոշիչները և գնան առաջ: Ինչ վերաբերում է իմ մամուլի ասուլիսին, կրկնում եմ, ես մնում եմ իմ կարծիքին, համապատասխան տարբեր շրջանակներում քննարկումներ եմ իրականացնելու ֆիզիոլոգների, հոգեբանների, տարբեր մասնագետների մասնակցությամբ, որ եթե 26 տարեկանից հետո հայ աղջիկը ցանկանում է զբաղվել իր սիրած անձնավորության հետ սեռական կյանքով, հասարակությունը նրան նորմալ պետք է վերաբերվի: Ով ուզում է զբաղվել, կարող է զբաղվել, ով գտնում է, որ ինքը պետք է պահպանի իր կուսությունը, ենթադրենք 35 տարեկան նույնպես, կարող է պահպանել, դա իր գործն է:
- Մի քանի տարի առաջ կարմիր խնձորը թաղեցին, նման ակցիա կազմակերպեցին, բայց այդ ավանդույթը չվերացավ: Հայաստանում դժվարությամբ է դուրս մղվում, այս դեպքում ինչպե՞ս եք Ձեր կոչերը տեղ հասցնելու:
- Ինչքան չբարձրաձայնենք այս թեման, այնքան այն նորից կխլանա: Բնականաբար, թեմային ոչ թե փոխադարձ վիրավորանքներով կամ սիրողական մակարդակով պետք է մոտենալ, այլ պետք է մոտենալ մասնագիտորեն՝ մարդու օրգանիզմի ֆիզիոլոգիայի տեսանկյունից: Կարմիր խնձոր են թաղել, տարբեր հաղորդումներ են պատրաստվել, բայց նման հնչեղություն չի եղել, իսկ այսօրվա հնչեղությունը պայմանավորված է տարբեր, այսպես ասած, ուժիկներ են առաջ եկել, տարբեր քաղաքական մոտիվներով մարդիկ կան, ովքեր հասկանում են, որ Անի Զախարյանը քաղաքականության մեջ լուրջ դերակատարություն ունեցող անձ է: Նախապես ասում եմ, որ այն բոլոր ծրագրերը և քաղաքական մշակույթը, որ պետք է դրվի հանրության դատին, դա կլինի այն ապացույցը, թե այս քսան տարվա ընթացքում բոլոր կուսակցությունները և իրենց քաղաքական գործիչ համարող անձնավորությունները ինչով են զբաղվել և թե հիմա ինչ է անելու Հայաստանի քաղաքական մշակույթ կուսակցության նախագահ Անի Զախարյանն իր թիմով:
- Վերջին շրջանում գենդերի մասին օրենքը լայն քննարկման է դրվել, շատերն են ընդդիմանում, Դուք ի՞նչ կարծիք ունենք օրենքի մասին:
- Մեր ծրագրերում հստակ ամրագրված է՝ եվրաինտեգրում, իսկ եվրաինտեգրումը հետևյալն է՝ պարտադիր չէ, որ մենք մտնենք Եվրամիություն, դա ապագա բանակցությունների, դիվանագիտական հարաբերությունների խնդիր է, եվրոպական ինտեգրում եվրոպական նորմերին, եվրոպական հասարակությանը՝ առանց արվամոլության, առանց աղանդավորական շարժման: Աղանդավորություն ասվածին միանշանակ դեմ եմ, եթե կան նման երևույթներ, ապա դրանք հիվանդագին երևույթներ են և մասսայականացնել, օրենքի սահմաններում ուժ տալ, միանշանակ պետք է պայքարել դրա դեմ:
Կինը տղամարդու համար է ստեղծված, տղամարդը՝ կնոջ: Այդ արվամոլության գաղափարը միանշանակ անընդունելի է, բայց պատմությունից գիտենք, որ տարբեր արվեստագետներ իրենց կյանքի օրոք ունեցել են նման դրսևորումներ:
- Նշեցիք, որ միանշանակ եվրաինտեգրացիայի կողմնակից եք: Սերժ Սարգսյանի՝ սեպտեմբերի 3-ի՝ ՄՄ անդամակցության մասին հայտարարությունը Ձեզ մտահոգվելու առիթ տվե՞լ է, ի՞նչ վտանգներ եք տեսնում:
- Միանշանակ տեսնում եմ վտանգներ և միանշանակ կողմ էի ԵՄ ասոցացման համաձայնագրի ստորագրմանը, որովհետև իր վերջին հարցազրույցում Հովիկ Աբրահամյանը նշել է, որ ՄՄ-ի չափորոշիչները` թե ինչ առավելություններ և թե ինչ թերություններ ունեն, մենք չենք կարող փաստաթղթի ձևով ներկայացնել, որովհետև նման փաստաթուղթ չկա: Իմ կարծիքով` ԱԺ նախագահի մեկնաբանություն չէ սա, որովհետև ցանկացած լուրջ դիվանագիտական երևույթ պետք է ամրագրված լինի փաստաթղթի տեսքով, և այդ փաստաթուղթը պետք է քննարկվի ԱԺ մակարդակով, բոլոր կուսակցությունների ղեկավարների հետ քննարկումներ պետք է իրականացվեն: Եվ գնալ գաղտնի ձևով ստորագրություն իրականացնել, որքանո՞վ է նորմալ և ի՞նչ են ակնկալում քաղաքական ուժերից այսօրվա իշխանությունները: Վտանգի տակ է դրվում եվրոպական ասոցացման համաձայնագրի ստորագրումը, որովհետև Եվրոպան շատ լավ գիտակցում է, որ մաքսային համագործակցության շրջանակներում սա միայն տեսական ծրագիր չէ, սա ռազմավարական նշանակություն ունեցող ծրագիր է, և նորից Հայաստանը Ռուսաստանի մի մասը դարձնելու ծրագիր է: Ռուսաստանը, օգտվելով Հայաստանի այսօրվա ներքաղաքական իրավիճակից, այսպիսի թույլ իրավիճակից փորձում է օգտվել և ամբողջ Հայաստանի ռեսուրսն օգտագործել իր համար, բայց միևնույն ժամանակ, այս ամենով հանդերձ, մենք պետք է կարողանանք դիվանագիտական կայուն հարաբերություններ կառուցել Ռուսաստանի հետ: Տնտեսական լուրջ համագործակցություն սկսել, բայց թույլ չտալ, որ ՌԴ-ն լինի մեր ներքին ազգային հարցերի լուծողն ու ուղղորդողը: Այսօր անկախության օրն է, ի՞նչ անկախության մասին մենք կարող ենք խոսել այս ընդհանուր մթնոլորտում:
- Կինը մեր իրականության մեջ կոմպլեքսներ ունի և անկախ չէ, գերակշիռում է ազգային մենթալիտետը: Կուսաթաղանթ կարելու թեման մեր օրերում շատ ակտուալ է, լուրջ բիզնես է անգամ համարվում: Ինչպե՞ս եք վերաբերվում դրան:
- Եկեք աչքերը չփակենք այդ փաստի վրա, և կտեսնենք, որ հայ աղջիկները ուղղակի այդ փաստը պահպանելու համար ինչ միջոցների են դիմում: Բնականաբար, ո՞րն է ավելի ընդունելի, որպեսզի հայ աղջիկը իր որոշակի սեռահասունության տարիքում նորմալ սեռական կյանք ունենա իր զուգընկերոջ հետ, թե՞ ստիպված լինի այլ դրսևորումների, այլ այլասերվածությունների գնալ, և իսկապես ինչքան մեծ է կուսաթաղանթների արհեստական միջամտության տոկոսայնությունը: Ի վերջո, հայ տղան անընդհատ ցանկանում է խաբվա՞ծ լինել: Գիտեք ինչի վրա եմ զարմանում, որ հայ կինը, հայ աղջիկը եթե գիտակցում է, որ հայ տղան իրեն ընտրում է՝ հաշվի առնելով կուսաթաղանթը առկա է թե ոչ, դա շատ վիրավորական է: Հայ կինը պետք է գիտակցի, որ տղամարդը պետք է ընտրի իրեն իր բարոյական նկարագրի համար, իր մարդկային արժեքների համար, թե ինչպիսի զուգընկերուհի նա կարող է լինել իր տղամարդու համար, ինչպիսի ընկեր, ինչպիսի կյանքի ուղեկից կարող է լինել, ինչպիսի հոգևոր էակ կարող է լինել, որ այդ տղամարդը նրա կողքին կարողանա իրեն բավարարված զգալ:
Ի դեպ, մամուլիս ասուլիսից հետո համալսարան մտա, բնականաբար «Ֆեյսբուքում» քննադատողներ կան, բայց միևնույն ժամանակ ուսանողուհիներիս մի ամբողջ զանգված, տարբեր մարդիկ ասում էին՝ Անի ջան միանշանակ դուք ճիշտ եք, մենք ձեր կողքին ենք: Եվ ինձ քննադատողները ունեին քաղաքական միտում: Օրինակ՝ «Նախախորհրդարանից» Տիգրան Խզմալյանը, Աշոտ Մանուչարյանի օրինակը և տարբեր, սա նպատակ ունի կասեցնելու նոր քաղաքական մշակույթի գործունեությունը:
- Որտեղի՞ց են գոյանում Ձեր կուսակցության միջոցները, թափանցիկություն ապահովելո՞ւ եք:
- Ամիսուկես է՝ ինչ մեր կուսակցությունը գրանցվել է. կուսակցությունը գործունեություն է ծավալում է միմիայն մեր միջոցներով, միևնույն ժամանակ շատ լավ հասկանում եմ, որ լուրջ ծրագրեր իրականացնելու համար հարկավոր է լուրջ ներդրումներ, և այս պահին մեր կուսակցությունում լուրջ քննարկումներ են ընթանում Հայաստանում երեք տնտեսական ճյուղերի զարգացման ուղղությամբ: Սփյուռքի գործարարներն իրենց ներդրումը պետք է ունենան մեր ծրագրերի իրականացման համար: Մենք մշակում ենք այնպիսի տնտեսական ծրագրեր, որոնք ռազմավարական լուրջ նշանակություն ունեն մեր հասարակության համար և տնտեսության զարգացման լուրջ ուղիներ են հանդիսանալու: