Արյունահոսություն քթից. ինչպե՞ս օգնել

Մեզանից յուրաքանչյուրի կյանքում  թեկուզ մի անգամ քթից արյուն է եկել: Հիմնականում արյուն է գալիս քթի խոռոչի առաջնային հատվածներից: Այդ երևույթը հազար ու մի պատճառ ունի, որոնք երբեմն զանազան հիվանդություններ են մատնանշում:

Դրանցից են`

• Արյան մակարդելիության խանգարում, հեմոռագիկ դիաթեզ:

• Վիտամինային անբավարարություն, առաջին հերթին C վիտամինի պակաս: Այդ երևույթի հետ նաև  անոթների փխրունություն է առաջ գալիս և քթից արյունահոսում է նույնիսկ աննշան վնասվածքների դեպքում:

• Գերհոգնածություն, սթրես, անքնություն:

• Քթի խոռոչի  լորձաթաղանթի չորություն, որը կարող է կապված լինել  նաև մասնագիտության կամ էլ ժառանգականության հետ: Ընդ որում՝ այդ դեպքում քթի մեջ  կեղևկալում է:

• Մրսածությամբ պայմանավորված կամ էլ վիրուսային հիվանդությունների հետևանքով՝ գրիպ, ադենոիդ, սուր քթաբորբ:

• Օրգանիզմի գերտաքացում, ջերմային կամ արևահարություն:

• Սրտանոթային հիվանդություններ, արյան բարձր ճնշում, աթերոսկլերոզ, անոթային խանգարումներ:

• Ալերգիկ հիվանդություններ, որոնց դեպքում ալերգածինն ազդում է քթի լորձաթաղանթի վրա, ինչի հետևանքով անոթները լայնանում են:

• Քթում պոլիպների առկայություն:

• Հորմոնալ հավասարակշռության խախտում` կապված  հղիության, սեռահասունացման ու հիվանդության հետ:

• Օդի՝ չափից դուրս  չորություն:

Հիվանդության ծագման հետ կապված` ընտրվում է համապատասխան բուժում: Եթե  արյունահոսությունն արյան բարձր ճնշման հետ է կապված, ապա ճնշումը պետք է կարգավորել: Կոտրվածքների դեպքում նախ պետք է  վնասվածքաբանը հետազոտի, իսկ եթե պատճառը պոլիպն է կամ ուռուցքը, ապա դրանք պետք է վիրաբուժական ճանապարհով հեռացվեն: Իսկ եթե վերջերս եք վերադարձել արտասահմանից և հաճախակի եք արյունահոսություն ունենում, որն ուղեկցվում է դողով ու ջերմությամբ, ապա դա կարող է մալարիայի ազդանշան լինել:

Ի՞նչ կարելի է անել արյունահոսությունը դադարեցնելու համար

Փորձեք խուճապի չմատնվել, որովհետև հուզմունքից սիրտն ավելի հաճախ է բաբախում: Ավելի լավ է նստել ու թեթևակի գլուխն առաջ հակել, սառույց դնել քթի միջնապատին կամ էլ ջեռակ` ոտքերին, այդ  դեպքում արյունը գլխից դեպի ոտքերը կհոսի:

Եթե արյունահոսություն է սկսվել, ոչ մի դեպքում չի կարելի գլուխը հետ գցել, քանի որ այն կարող է շնչուղիների մեջ լցվել: Մի՛ պառկեք,  մանավանդ առանց բարձի, ոտքերը վեր մի՛ բարձրացրեք, քանի որ արյան հոսքը դեպի գլուխ կուժեղանա: Արյունահոսության կանգից հետո մի՛ շտապեք անմիջապես ինչ-որ բան ուտել կամ թեյ ու սուրճ խմել․ դրա հետևանքով կարող է ճնշումը բարձրանալ ու արյունահոսությունը կրկնվել: Ռունգերը սեղմեք ու քթանցքի մեջ ջրածնի գերօքսիդի մեջ թրջած բամբակ դրեք: