FashionYan-ն իր Hand made բաժնի համար նոր շարք է սկսում` «Հայկական hand made-ի ձեռքերը», որտեղ ներկայացնելու ենք տեղական հենդ մեյդի սկսնակ և առաջատար մասնագետներին ու նրանց աշխատանքները: Շարքն սկսում ենք երիտասարդ մի աղջկա`Անի Մանուկյանի հետ զրույցից, ով հիմնել է Manoukyan Asseccories բրենդը:
-Ողջույն, Անի: Կպատմե՞ս, թե ինչպես ծնվեց զարդեր պատրաստելու ցանկությունը:
-Միշտ էլ անտարբեր չեմ եղել գեղեցիկի նկատմամբ և ստեղծագործել եմ դեռ մանկուց: Ծնողներս պատմում են, որ 4 տարեկան հասակում փուչիկներից տիկնիկներիս համար զգեստներ էի պատրաստում: Միշտ էլ ինձ համար զարդեր պատրաստել եմ, բայց երբևէ մտքովս չէր անցնի, որ կպատրաստեմ նաև վաճառքի համար: Արդյունքում՝ իմ հոբբին վերածվեց փոքրիկ աշխատանքի:
-Ի՞նչ նյութերից ես պատրաստում զարդերը:
-Հիմնականում օգտագործում եմ տարբեր տեսակի և գույների քարեր, թելեր, կաուչուկ, մետաղներ և այլն: Շուտով կլինեն նաև կրծքազարդեր և գլխազարդեր:
-Ինչի՞ց ես ոգեշնչվում նոր աքսեսուարներ ստեղծելիս:
-Ոգեշնչման աղբյուր կարող են լինել տարբեր բաներ՝ գեղեցիկ առավոտ, հիանալի ֆիլմ, ջերմ խոսքեր և հետաքրքիր մարդկանց հետ շփում: Ամենից շատ ոգեշնչվում եմ, երբ իմ աշխատանքները գնահատվում են:
-Պատվերներ ընդունու՞մ ես, եթե` այո, ապա ի՞նչ կհրաժարվես երբևէ պատրաստել և ինչու՞:
-Ընդունում եմ տարբեր պատվերներ՝ ըստ ձևի, գույնի, հետաքրքրությունների: Իհարկե, ճաշակին ընկեր չկա, բայց երբեք չեմ պատրաստի մի բան, ինչն ինձ դուր չի գալիս, ինչն ինձ համար տգեղ է: Ես ստեղծագործում եմ իմ հաճույքի համար և պետք է բավարարված զգամ ամեն մի աշխատանքի ավարտից հետո: Ես դրանից գերագույն հաճույք եմ ստանում: Այն պետք է լինի գեղեցիկ ինձ համար:
-Ի՞նչ դժվարությունների ես հանդիպում:
-Փորձում եմ ստեղծել օրիգինալ աշխատանքներ, չկրկնվող: Դրանք իմ ներքին մղումներն են, իմ ապրումները, իմ ստեղծագործությունները, և ցավալի է, որ դրանք երբեմն համեմատվում կամ նմանեցվում են ուրիշ աշխատանքների: Ամեն դեպքում, մարդիկ բոլոր ժամանակներում և տարբեր վայրերում ստեղծել են նման իրեր: Ես փորձում եմ տարբերվել իմ աշխատանքներով: Դժվար է գտնել համապատասխան խանութներ զարդերը տրամադրելու համար: Շատ դժվարություններ կան: Դրանք հաղթահարելը թույլ է տալիս ամուր կանգնել հողի վրա:
