Երբ հարցը վերաբերում է սթրեսին, պետք չէ դրանում մեղադրել միայն ձեր ղեկավարին: Այս լարված թվային դարաշրջանում սթրեսն ասես մեր կյանքի անբաժան մասը դարձած լինի: Մենք հաճախ ենք անցնում սթրեսների միջով, և դրանք ազդում են մեր նյարդային համակարգի վրա:
Վերջերս կատարված մի հետազոտության արդյունքներից պարզ է դարձել, որ սթրեսի հետևանքով մարդիկ հաճախ կորցնում են ինքնատիրապետումը և ավելի բռնկուն դառնում: Սթրեսին հանգեցնող հիմնական գործոններից են մեքենա վարելը, աշխատանքը, մեծ ընտանիքը և սիրային հարաբերությունները: Սթրեսը ոչ միայն խաթարում է մեր հոգեկան անդորրը, այլև կարող է հանգեցնել գիրության, արյան բարձր ճնշման և ցածր աշխատունակության:
Դիետոլոգ Քերի Գանսն ասել է. «Շատ կարևոր է, թե ինչպիսի սնունդ ենք մենք ընդունում: Ես միշտ ասում եմ իմ պացիենտներին, որ անկախ նրանից, թե ինչ է կատարվում իրենց շուրջ, իրենք պետք է հետևեն իրենց սննդակարգին»: Ահա այն հինգ մթերքները, որ հանգեցնում են սթրեսի:
1 Խուսափե՛ք սուրճի չարաշահումից
Օրը մի բաժակ տաք սուրճով սկսելը առաջին հայացքից գուցե լավ միտք թվա, սակայն անգամ լավ բաների չարաշահումը կարող է վատ հետևանքների հանգեցնել: Շատ քանակությամբ կոֆեինը, լինի դա սուրճի թե էներգետիկ ըմպելիքների մեջ, կարող է առաջացնել անհանգիստ վիճակ և կոնցենտրացիայի (ուշադրության կենտրոնացման) հետ կապված խնդիրներ: Եթե չեք կարող հրաժարվել սուրճից, ապա կրճատեք դրա օգտագործումը: Խորհուրդ չի տրվում օրեկան երկու բաժակից ավել սուրճ ընդունել: Փորձեք փոխարինել սուրճը սև թեյով, որի մեջ բազում հակաօքսիդանտներ են պարունակվում:
2 Կրճատե՛ք աղի օգտագործումը
Նայե՛ք, թե ինչով են ճաշում ձեր շրջապատի մարդիկ և ամենայն հավանականությամբ կտեսնեք, որ նրանց սննդակարգում առատ է մսեղենը, պանիրը և տարբեր համեմունքներով սենդվիչները: Սենդվիչը կարող է առողջ սննունդ թվալ, սակայն դրա բաղադրատարրերը հարուստ են նատրիումով, որը կարող է հանգեցնել արյան բարձր ճնշման: Ուստի խուսափե՛ք այսպիսիս սնունդ ընդունելուց:
3 Մի՛ չարաշահեք քաղցրավենիքի օգտագործումը
Որոշ մարդիկ կարծում են, թե ցերեկը քաղցրավենիքների օգտագործումը օգնում է, որպեսզի նրանք սով չզգան մինչև աշխատանքային օրվա ավարտը: Բարձր կալորիականությամբ, սակայն սննդային ցածր արժեքով սնունդը, օրինակ` կոնֆետներն ու թխվածքաբլիթները, լի են պարզ ածխաջրերով: Դրանց օգտագործումից օրգանիզմում կատարվում են այնպիսի պրոցեսներ, որոնց հետևանքով մարդու մոտ հոգնածության զգացում է առաջանում:
Փորձե՛ք օգտագործել այնպիսի սնունդ, որը լի է սպիտակուցներով, վիտամիններով և հանքանյութերով, որոնք օգնում են կանոնակարգել սթրեսը: Փորձե՛ք այնպիսի համադրություններ, ինչպիսին է օրինակ հումուսն ու ստեպղինը:
4 Վե՛րջ տվեք տապակած սնունդ ընդունելու սովորությանը
Ճարպոտ սննդամթերքը նպաստում է արյան բարձր ճնշման առաջացմանը: Ճարպոտ սննդամթերքը նաև սրում է սթրեսի բացասական հետևանքները և վնասում սրտի նորմալ աշխատանքին: Գանսն ասում է, որ մարդիկ հաճախ մոռանում են, որ ճարպի մակարդակը բարձր է ոչ միայն տապակած կերակուրների մեջ: Ճարպոտ սսննդամթերքի թվին են դասվում նաև կաթնամթերքի որոշ տեսակներ, օրինակ` պանիրն ու պաղպաղակը:
5 Նվազեցրե՛ք ալկոհոլի օգտագործումը
Չափից շատ ալկոհոլը բացասաբար է ազդում ոչ միայն ձեր լյարդի և արտաքին տեսքի վրա: Խումհարը կարող է նվազեցնել ձեր աշխատունակությունը: Սա նշանակում է, որ ստիպված կլինեք հավելյալ աշխատաժամեր անցկացնել` հետ չմնալու համար: Գանսն ասել է. «Մարդկանց շրջանում տարածված է այն տեսակետը, թե երկար սթրեսային օրվա վերջում ալկոհոլը հանգստացնող ու լիցքաթափող ազդեցություն է գործում, սակայն դրա չարաշահումը կարող է միանգամայն հակառակ ազդեցությունն ունենալ»: Ալկոհոլն ավելացնում է կորտիզոլի` սթրեսի հորմոնի քանակը, որի հետևանքով կարող է առաջանալ սթրես և քաշի ավելացում:
