Էրիխ Մարիա Ռեմարկ. լավագույն քաղվածքները գրքերից

Էրիխ Մարիա Ռեմարկ, հայտնի գերմանացի գրող։ 20-րդ դարի ամենահանրահայտ և ընթերցվող գրողներից։ Նրա հայտնի ստեղծագործություններից են՝ «Արևմտյան ռազմաճակատում անփոփոխ է» (1929), «Երեք ընկեր» (1936), «Հաղթական կամար» (1945) և այլն։ Առաջ է քաշել «կորած սերունդ» գրական հասկացությունը։

Երջանկություն

• Երջանկությունը մեր շուրջը թափված է, պետք է միայն կռանալ և վերցնել: 
• Միայն հասարակ բաներն են, որ երբեք չեն հիասթափեցնում: 
• Երջանկությունը մարդ ձեռք է բերում հաճախ ավելի հեշտ, քան կարծում է: 
• - Երջանկություն… որտեղի՞ց է սա սկսվում և որտե՞ղ է վերջանում:
  - Երջանկությունը քեզանով սկսվում է և քեզանով վերջանում: Դա շատ հասկանալի բան է: 
• Երջանկության մասին կարելի է խոսել միայն 5 րոպե, ոչ ավել: Պատմելու շատ բան էլ չկա` ես երջանիկ եմ և վերջ: Իսկ դժբախտ մարդիկ իրենց դժբախտության մասին կարող են խոսել ժամերով:
• Ամենալավ քաղաքը այն քաղաքն է, որտեղ մարդը երջանիկ է:

Սեր

• Ինչպե՞ս կարող է սերը կատարյալ լինել, եթե ես ամեն գիշեր կորցնում եմ քեզ` աչքերս փակելով: 
• Սիրել նշանակում է ցանկանալ ինչ-որ մեկի հետ ծերանալ: 
• Երբեմն սերը նույնպես ուրախություն չի բերում… 
• Ոչ ոք չի կարող այնքան օտար դառնալ, քան նա, ում նախկինում մենք սիրել ենք:
• Առանց սիրո մարդը ոչ այլ ինչ է, եթե ոչ արձակուրդում գտնվող դիակ՝ մի քանի տարեթիվ, պատահական անուն… 
• Մենք ամեն ինչից կտրված ենք, մեր ունեցածը միայն մեր սրտերն են: 
• Միշտ մանրուքներն են, որ բացատրում են ամեն ինչ… մեծ արարքները ոչինչ չեն բացատրում… 
• Սերը տանել չի կարողանում բացատրությունները, նրան արարքներ են հարկավոր

 Մարդ

• Մարդն ազատ է զգում իրեն միայն այն ժամանակ, երբ այլևս չկա այն, ինչի համար ինքն ապրում էր: 
• Մարդը հակված է վստահել նրան, ում չի ճանաչում, դա նրա անբաժանելի հատկություններից մեկն է: 
• Մարդը ծերանում է միայն այն ժամանակ, երբ ոչինչ այլևս չի զգում…

Կանայք

• Կնոջը կամ պետք է աստվածացնել, կամ թողնել ու հեռանալ: Միջին դրություն գոյություն չունի: 
• Տարօրինակ է, թե կինը որքան սքանչելի կարող է մնալ նույնիսկ իր ստորությունների մեջ: 
• Կանանց երբեք պետք չի ինչ-որ բան բացատրել, բրանց հետ պետք է գործել:
• Կինը, ով պատկանում է ուրիշին, հինգ անգամ ավելի ցանկալի է, քան նա, ում կարելի է հասնել, տարօրինակ է...

Կյանք

• Ամենամեծ ու անհավատալի արկածը մեր օրերում` խաղաղ ու պարզ ապրելն է: 
• Եթե ձեր երազանքը հեշտությամբ է ի կատար ածվել, կնշանակի՝ դա անպետքություն էր, այլ ոչ թե երազանք:
• Կինը սիրուց խելացի է դառնում, իսկ տղամարդիկ կորցնում են գլուխները

• Եթե դեռ ցանկանում ես ապրել, կնշանակի, որ դեռ սիրելի ինչ-որ բան ունես: Այդպես, իհարկե, դժվար է, բայց միևնույն ժամանակ հեշտ է: 
• Աշխարհի դժբախտությունը հենց նրա մեջ է, որ մենք չենք զգում մեր գործողությունների հետևանքները…
• Իսկ գիտե՞ք, թե ամենասարսափելին որն է: Իբրև գաղտնիք ձեզ կխոստովանեմ, որ ամենադժվարն այն է, երբ վերջիվերջո ամեն բանի հետ համակերպվում ես:
• Իսկ խնայողությունն ինչի՞ համար է... Չէ՞ որ քեզ նույնպես չեն խնայում: 
• Կյանքը նկատի չի ունեցել մեզ կատարյալ դարձնել: Ով կատարյալ է, նա պատկանում է թանգարանին: 
• Միշտ իրավացին նա է, ով առաջինն է հարված հասցնում: 
• Հրաժեշտի ժամանակ ամենաճիշտ բանը գնալն է:  
• Այն ժամանակ մնում է լոկ դատարկ մի ամայություն: Հետո այդ ամենը անցնում է, և մարդ նորից սկսում է կամաց-կամաց վերակենդանանալ… 
• Մոռանալ: Մի տես, թե ինչ խոսք է: Ո՞վ կարող է ապրել առանց մոռացության: Սակայն ո՞վ կարող է մոռանալ այն ամենը, ինչ ինքը չի ուզում հիշել: