13 տարեկան Գոռը միայնակ 55 ժամ մեքենայի ղեկին է եղել՝ 8 հոգանոց ընտանիքին Արցախից Հայաստան հասցնելու համար: Այլընտրանք չի ունեցել, գրում է «Ազատություն»-ը:
«Քանի որ ամուսինս դիրքերում էր, մեզ պետք է գյուղից հանեին, ռուսներն ասացին՝ եկեք մեզ մոտ, մնացեք բազայում։ Տղաս մեզ հանեց գյուղից, ոչ միայն մեր ընտանիքին, հարևաններին նաև՝ երկու ընտանիք։ Իր էդ հասակում ես զարմացա՝ ոնց տարավ, հասցրեց», - պատմում է մայրը։
Հակարիի կամրջի անցակետում ադրբեջանցի սահմանապահները մեքենայից իջեցրել ու հեռացրել են Գոռի 70-ն անց պապուն։
Ասում է՝ հարցրել են՝ «Խոջալուում քանի՞ ադրբեջանցու ես սպանել»։ Շունչը պահած սպասել է անցակետում, մինչև պապը վերադառնա, վախից կծկվել է՝ բա որ չկարողանա ընտանիքին Հայաստան հասցնել, բա որ պապը չվերադառնա։
Արցախի Խնապատում ծնված 13-ամյա Գոռն ավելի քան երկու ժամվա ծանր ճանապարհին միայն մեկ անգամ է ընկրկել, երբ մոտեցել են ադրբեջանցիների անցակետին, բայց դա էլ է հաղթահարել։ Հիշում է՝ հետևում թողեց հայրենիքը, տունը, մանկությունը։
Գոռի քույրը պատմում է՝ մի քանի բուռ ալյուր էին Արցախից վերցրել։ Երբ երկու փոքրիկները սովին չեն դիմացել, ավտոշարասյունն էլ քայլ-քայլ է առաջ շարժվել, մայրը ստիպված հենց փողոցի եզրին խմորը հունցել ու լավաշ է թխել. - «Մարդիկ կային հավաքված, գալիս էին, մտածում էինք՝ բարեգործական է, նույնիսկ իմ երեխաներին չհասավ։ Մաման լացում էր, ասում էի՝ խնդրում եմ մի լացի, միայն ողջ ու առողջ դուրս գանք էստեղից»։
9-րդ դասարանն ավարտած գոռը դեռ Խնապատում է որոշել՝ պետք է արագ գումար աշխատի ու ընտանիքին օգնի։ Իր կամքից անկախ ղեկին օրեր անցկացրած Գոռն ամեն օր խնամքով մաքրում է մեքենան, որով Արցախից հեռացել են ընդամենը 4-5 տոպրակով։
