Երևանի Նուբարաշենի աղբավայրում բռնկված հրդեհը երկու օր է, ինչ մարվել է, սակայն քաղաքապետարանը որոշել է շարունակել աղբավայրի տարածքում ամենօրյա աշխատանքը։
Այս մասին Երևանի քաղաքապետարանի գործակարգավարական նիստում հայտնեց Երևանի քաղաքապետի խորհրդական Կամո Արեյանը։
Նրա խոսքով՝ աղբավայրի հրդեհն ամբողջությամբ մարվել է շաբաթ օրը` մայիսի 27–ին, կեսօրից հետո։ Սակայն որոշվել է շարունակել տարածքի մշակման աշխատանքները՝ ամռանը հնարավոր հրդեհներից խուսափելու համար:
«Որոշվել ենք աղբավայրում ամենօրյա ռեժիմով հող տեղափոխել և տարածքի մշակում իրականացնել՝ ամռանը և առհասարակ նման դեպքերը կանխելու նպատակով»,- ասաց Արեյանը։
Նա հայտնեց նաև, որ աղբավայրի հրդեհը մարելու համար պահանջվել է 17 հազար տոննա ջուր և 2300 բեռնատար հող։
Փոխքաղաքապետ Տիգրան Ավինյանն էլ նշեց, որ ստեղծված իրավիճակի լուծումը կլինի նոր աղբավայրի կառուցումը։
