Հյուսիսային Կորեայի ղեկավար Կիմ Չեն Ընն արգելափակել է մի ամբողջ քաղաք այն բանից հետո, երբ այնտեղ 653 փամփուշտ է անհետացել: Այս մասին գրում է Daily Mail-ը:
Աղբյուրը մանրամասնում է, որ պատասխանատու մարմինների ներկայացուցիչները մոտ 200 000 բնակչություն ունեցող Հիեսան քաղաքում տնետուն խուզարկություն են անցկացրել զինամթերքը գտնելու համար, «Ազատ Ասիա» ռադիոկայանին հայտնել է երկու աղբյուր:
«Քաղաքը… կմնա արգելափակման մեջ, քանի դեռ չեն հայտնաբերվել բոլոր 653 փամփուշտները», - անանուն բնակիչն ասել է «Ազատ Ասիա» ռադիոկայանի կորեական ծառայությանը:
Զինամթերքի կորելու փաստը հաստատվել է մարտի 7-ին, երբ Կորեայի ժողովրդական բանակի 7-րդ կորպուսի զինվորները հետ էին քաշվում Չինաստանի հետ սահմանին քաղաքի հարակից տարածքից:
«Զորքի դուրսբերման գործընթացում փամփուշտների կորստի պատճառով լայնածավալ հետաքննություն է ընթանում», - ասել է քաջատեղյակ աղբյուրը:
Նրա փոխանցմամբ՝ զինվորները սկզբում չեն հայտնել անհետացման մասին և փորձել են իրենք գտնել փամփուշտները։
«Բայց երբ չեն կարողացել գտնել դրանք, տեղեկացրել են բնակիչներին և սկսել խստագույն որոնում»,- շարունակել է աղբյուրը:
Ոստիկանությունն ու զինվորականները հետաքննություն են սկսել, շրջափակել են ամբողջ քաղաքը և սկսել տունառտուն խուզարկել, ասել է աղբյուրը:
