Bravo.am-ը գրում է․
Ռուսական MAXIM ամսագիրը շարունակում է ներկայացնել ամենագրավիչ դերասանուհիներին, հերթը հասել է նաեւ հայուհիներին: Ամսագրի կազմած ցանկում են ինչպես Հայաստանում բնակվողները, այնպես էլ արտերկրում գործունեություն ծավալող հայկական արմատներով գեղեցկուհիները:
Տատա Խաչատրյան
Նա ծնվել ու մեծացել է Սանկտ Պետերբուրգում, սակայն բազմիցս է նշել, որ իրեն հայուհի է համարում ու շատ լավ է տիրապետում լեզվին: Տատայի գեղեցկությամբ ու տաղանդով հիացած Վլադիմիր Մերեժկոն հատուկ նրա համար իր նախագծում դեր է գրել: Խաչատրյանը նկարահանվել է «Մաժոր», «Ռայան ամեն ինչ գիտի», «Նշտար» սերիալներում: Վերջին շրջանում հատկապես ակտիվ է թատրոնում ու «Շահանե» ներկայացման գլխավոր դերակատարն է:
Լուիզա Ղամբարյան
Ղամբարյանին ամսագիրը ներկայացրել է որպես առավել հայտնի թատերական դերասանուհի: Հրաչյա Ղափլանյանի անվան թատրոնի դերասանուհին մարմնավորել է Ջուլիետին «Ռոմեո եւ Ջուլիետ»-ում, Սոֆիին՝ «Չաո»-ում: Նկարահանվել է «Անավարտ թռիչք», «Շնորհակալություն, հայրիկ» ֆիլմերում:
Ամսագիրը մոռացել է նշել դերասանուհու եւս մի քանի կարեւոր դերեր թատրոնում, կինոյում ու սերիալներում:
Անժելա Սարգսյան
Այժմ ԱՄՆ-ում բնակություն հաստատած ու սերիալներում նկարահանվող Սարգսյանը MAXIM-ի հաջորդ գեղեցկուհին է: Նա ավարտել է Երեւանի կինոյի ու թատրոնի ինստիտուտը, խաղացել է թատրոնում ու զբաղվել երաժշտությամբ:
Սոֆյա Պողոսյան
Սոֆյա Պողոսյանն առավել հայտնի է սերիալներում իր մարմնավորած դերերի շնորհիվ, նա նաեւ հաղորդավարուհի է աշխատել: Վերջերս փոքրիկ է ունեցել ու հիմնականում զբաղվում է նրա խնամքով՝ շարունակելով նաեւ նկարվել նոր նախագծերում:
Նազանի Հովհաննիսյան
Դե, էլ ինչ հայ գեղեցկուհիներ առանց Հովհաննիսյանի: Նա շատ երկար ու հետաքրքիր ուղի է անցել եւ Հայաստանում իսկական աստղ դարձել: Նախ աշխատել է հեռուստատեսությունում, ապա նկարահանվել ֆիլմերում, ամենապահանջված հայ դերասանուհիներից է: Սոցցանցերում Հովհաննիսյանի կյանքին հետեւում է կես միլիոնից ավելի հետեւորդ:
Անժելիկա Կաշիրինա
Կաշիրինան այնքան էլ ծանոթ չէ հայ ընթերցողներին, նրա իսկական ազգանունը Ասլանյան է, ծնվել է 1986 թվականին բաշկիրական Սալավատ քաղաքում՝ բժիշկների ընտանիքում: Կաշիրինան դերասանուհու մոր ազգանունն է: Նա ավարտել է Ռուսաստանի թատերական արվեստի ինստիտուտը, թատրոնի եւ կինոյի դերասանուհի է:
Անժելա Սարաֆյան
Նա ցանկի ամենաաստղային ու հայտնի դերասանուհին է, քանի որ իր գործունեությունը ծավալում է Հոլիվուդում: Սարաֆյանը ծնվել է Երեւանում, սակայն փոքր տարիքում ծնողների հետ տեղափոխվել է ԱՄՆ: Նա այնտեղ դերասանի վարպետություն է սովորել ու բալետ: Նկարահանվել է հայտնի «Վայրի արեւմուտքի աշխարհը» սերիալում եւ «Խոստումը» ֆիլմում:
