Lragir.am-ը գրում է.
Ժամանակին, վարչապետ Տիգրան Սարգսյանն ասում էր, թե կառավարության առաջնահերթությունների մեկը կրթութայն մատչելիությունն է: Նա ասում էր, որ ամենամեծ արժեքը մարդն է ու նրա ինտելեկտը, եւ կառավարությունն անելու է ամեն ինչ, որպեսզի ինտելեկտուալ մարդն ունենա զարգանալու հնարավորություն:
Ուսման վճարների թանկացումը հակասում է հռչակված առաջնահերթությանը, որովհետեւ ուղղված է ոչ թե ինտելեկտի պաշտպանությանը, այլ պայմանավորված է քաղաքացիների գրպանը մտնելու կառավարության մշտական ցանկությամբ: Եթե գազի ու սննդամթերքի թանկացումը ինչ որ տեղ կարելի է հիմնավորել, ուսման վճարների բարձրացումը չունի որեւէ ֆինանսական հիմնավորում: Դա ընդամենը ռեկտի հերթական փորձ է:
Ուսանողները կարծես թե վճռական են տրամադրված: Նախարարի հետ հանդիպումից հետո հասարակական կազմակերպությունների ներկայացուցիչները հայտարարել են, որ եթե իրենց պահանջները չկատարվեն, սեպտեմբերին ուսանողները դասադուլ կսկսեն:
Քաղաքացիներից պերմանենտ փող հավաքելու կառավարության քաղաքականությունը բախվել է քաղաքացիների դատարկ գրպաններին ու վճարելու ցանկության բացակայությանը: Առավել եւս, որ Հայաստանում գնագոյացման սկզբունքները վայրի են, դրանք պարզապես չկան՝ յուրաքանչյուրն իր ոլորտում գին է բարձրացնում ըստ իր հայեցողության: «Լիբերալ» պետությունը չի միջամտում այդ գործընթացներին, գին սահմանողներին թույլ տալով հարստանալ քաղաքացիների հաշվին:
Արմեն Աշոտյանն ասել է, որ իր նախարարությունն առաջարկում է օրենքի նախագիծ, որով կսահմանվի ուսման վճարների վերին շեմը: Նման շեմեր անհրաժեշտ են բոլոր ոլորտներում, այդ թվում ներկրումների, եւ եթե Աշոտյանի առաջարկն ընդունվի, դա կարող է նախադեպ դառնալ եւ դրական հետեւանքներ ունենալ:
Սակայն, դժվար թե խորհրդարանը ցանկանա տրորել բիզնեսմենների ոտքը, որոնք հիմնականում նստած են հենց խորհրդարանում: Ըստ ամենայնի, շեմը չեն ընդունի, եւ ուսանողները, ինչպես շատ երկրներում, իրենց վրա կվերցնեն հեղափոխական դերը: Հայաստանը կարող է փոխել միայն երիտասարդության եռանդը:
