«Հիվանդացության դեպքերն ավելացնում են նաև կորոնավիրուսի մուտացիան, ինչն առաջացնում է լրացուցիչ ռիսկեր ու բարդություններ». Կարեն Ավագյան

Հիվանդացության դեպքերն ավելացնում են նաև կորոնավիրուսի մուտացիան, ինչն առաջացնում է լրացուցիչ ռիսկեր ու բարդություններ։ Իհարկե, վիրուսի փոփոխությունները կարող են հանգեցնել դրա ազդեցության թուլացմանը, բայց վիրուսը նաև փոփոխվում է՝ ենթարկվելով առավել վտանգավոր մուտացիաների։

Ամեն անգամ վիրուսի փոփոխությունը ստեղծում է տարբեր պլատֆորմ վիրուսի մուտացիայի համար։ Որքան շատ է վիրուսը տարածվում, այնքան շատ է այն փոփոխվում։ Վիրուսը, որը չի տարածվում չի կարող մուտացիայի ենթարկվել։

Հայաստանում պատվաստվել է մոտ 80.000 մարդ, որի միայն 10% է, որ ստացել է ամբողջական պատվաստումը երկրորդ ներարկումով։

Պատվաստվողների մեծ մասն օտարերկրացիներ են։ Ըստ էության, անգամ այս թվերը շատ քիչ են, որոնք ներկայացվում են մանիպուլատիվ։ Նման տեմպերի պահպանմամբ կարելի է ասել, որ պատվաստման միջոցով իմունային շերտ ստանալը մեր երկրում դառնում է անիրատեսական։

Զարգացող երկրների ամենացածր ցուցանիշը բնակչության մոտ 10%-ի ամբողջական պատվաստումն է։ Չեմ խոսում այն երկրների մասին, որնք հատել են բնակչության թվի 50%-ի շեմը։

Մեր պարագայում այս թիվը տասնյակ անգամ նվազ է։

Ամեն օր բուժհաստատություններում սպառվում են ՀՀ քաղաքացիներին խիստ անհրաժեշտ և աշնանային ռիսկերը զսպող պատվաստանյութերն այլ երկրներից ժամանած անձանց վրա։

Այս ամենի պատճառն այն է, որ Հայաստանի բնակչությունը չի հավատում իշխանություններին։ Այնքան սուտ ու կեղծիք է ասվել կորոնավիրուսի մասին, որ մեր բնակչությունը պատվաստման մասով ևս թերահավատ է պատասխանատուների հանդեպ։ Իսկ պատվաստվող օտարերկրացիների մեծ թիվը լրացուցիչ հիմնավորում է, թե ինչպես են այլ երկրների կառավարություններ հաջողել սեփական բնակչությանը ճիշտ և անհրաժեշտ տեղեկատվության տրամադրման հարցում։