Մոտ 2-3 բաժակ ալյուրը (կարող եք 1 բաժակը փոխարինել եգիպտացորենի ալյուրով, նախապես ալյուրը քիչ վերցրեք, անհրաժեշտության դեպքում կավելացնեք) մաղել, 1 բաժակ գոլ ջրում լուծել 1 թ. գդալ խմորիչը և 1 թ. գդալ մանր աղը, թողնել, որ երեսին փրփուր առաջանա, այսինքն՝ խմորիչը ակտիվանա, ավելացնել 3 ճ. գդալ զեյթունի որակյալ ձեթ (extra virgin olive oil), հեղուկ զանգվածը լցնել ալյուրի վրա և խմոր հունցել, հունցել մոտ 5-7 րոպե. պետք է ստացվի փափուկ, չկպչուն խմոր: Թողնել տաք տեղում, որ բարձրանա (1-1.5 ժամ): Հասունացած խմորը գրտնակել 1 սմ հաստությամբ, վրան քսել սխտորով ձեթ (2 պճեղ ճզմած սխտորը խառնել 3 ճ. գդալ զեյթունի ձեթին և մի քիչ խոշոր աղ ավելացնել), ես նաև աղացած զեյթուն եմ ավելացրել: Գրտնակած խմորը երկարությամբ բաժանել 5-6 սմ լայնություն ունեցող ժապավենների: Առաջին ժապավենին ռուլետի տեսք տալ, ուղղահայաց տեղափոխել ջեռոցի տապակի մեջ (ես միշտ տապակը ծածկում եմ յուղաթղթով), կարող եք նույնը կրկնել մնացածի հետ և թխել փոքրիկ հացեր, ինչպես ես եմ արել կամ բոլոր ժապավենները փաթաթել առաջինի շուրջ և ստանալ 1 հատ մեծ ու շերտավոր հաց: 20 րոպեով թողնել տաք տեղում, որ հանգստանա, թխել նախապես 200 (400F) աստիճան միացրած ջեռոցում մոտ 30 րոպե: Զեյթունի ձեթը ներծծվում է խմորի մեջ, և հացը ստացվում է խռթխռթան: Պատրաստեք սնկով իտալական սուպ և վայելեք այս անուշահամ հացը (չնայած ես հենց այդպես էլ կերել եմ:)) Բարի ախորժակ :)
Խորհուրդ
Հաց թխելիս խմորի մեջ յոդացված աղ մի՛ լցրեք. այն խանգարում է խմորիչի աշխատանքին: Հաց կամ բուլկի թխելիս ջեռոցի ներքևի մասում ամանով տաք ջու՛ր դրեք. խմորիչով խմորը սիրում է գոլորշու մեջ թխվել: Երբ խմորը հասունանալու համար տեղափոխում եք ամանի մեջ, ամանը լավ պատե՛ք զեյթունի ձեթով և միշտ վերցրե՛ք մեծ և խոր աման, որ խմորի հասունանալու համար բավական տեղ լինի: Ամանի բերանը ծածկե՛ք շատ տաք ջրով լավ թրջած բամբակից սրբիչով և տեղափոխե՛ք տաք և առանց միջանցիկ քամու տեղ (ես նախապես ջեռոցը մի քանի րոպեով միացնում եմ, անջատում և գոլ ջեռոց եմ տեղափոխում խմորը, որ հասունանա):
