NEWS.am–ի տեղեկություններով՝ սեպտեմբերի 27-ին ադրբեջանական կողմի ռազմական ագրեսիայի հետևանքով զոհված  զինծառայողներից 35–ամյա Հասմիկ Արզումանյանը Սյունիքի մարզի Նորավան գյուղից էր։ Կրտսեր սերժանտ Հասմիկ Արզումանյանը ՀՀ զինված ուժերում էր 2014-ից։

Մեր տեղեկություններով՝  Հասմիկ Արզումանյանը ծառայում էր Կապանում, ունի 13–ամյա դուստր։

Հարազատների խոսքով՝ Հասմիկը հոգատար մայր էր, ընկերների շրջանում հարգանք վայելող կին։

Հասմիկի զինվորական ծառայությանն անդրադարձել է նաև «Հայրենասեր Հայուհի» ֆեյսբուքյան էջը, որտեղ գրված է. «ՀՀ ՊՆ հրամանատարական կազմի գնահատմամբ ծառայության ընթացքում իրեն դրսևորում է որպես գրագետ, բանիմաց և կարգապահ զինծառայող:

Ծառայակիցները հատկապես կարևորում են կազմակերպչական մեծ ջիղի, որի շնորհիվ կրտսեր սերժանտը բազմաթիվ նախաձեռնություններ էր հեղինակում»։

Հիշեցնենք՝ սեպտեմբերի 27-ին Ադրբեջանի զինված ուժերը լայնամասշտաբ հարձակում են ձեռնարկել Արցախի Հանրապետության պաշտպանության բանակի դիրքերի ուղղությամբ՝ շփման գծի ողջ երկայնքով։ Ադրբեջանական բանակի ռազմական հարձակումը ուղեկցվել է հրետանակոծություններով և օդային հարվածներով, այդ թվում՝ քաղաքացիական օբյեկտների և խաղաղ բնակչության ուղղությամբ։

Հայաստանի Հանրապետությունում և Արցախում հայտարարվել է ռազմական դրություն եւ ընդհանուր զորահավաք:

Պաշտոնական տեղեկություններով՝ հայկական կողմն ունի 31 զոհ։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել