Armtimes.com-ը գրում է․
«Բարգավաճ Հայաստան» կուսակցության ղեկավար Գագիկ Ծառուկյանը կկալանավորվի:
 
Երեւանի ընդհանուր իրավասության դատարանը, դատավոր Մնացական Մարտիրոսյանի նախագահությամբ վերադառնալով խորհրդակցական սենյակից, քիչ առաջ հրապարակեց այս որոշումը։
 
Նշենք, որ Ծառուկյանը նիստին չի մասնակցել. նա այս պահին արդեն ԱԱԾ շենքում է: Այնտեղ են գտնվում նաեւ նրա աջակիցները, հավաքված են ոստիկանական ուժեր:
 
Պաշտպան Սամվել Դիլբանդյանի խոսքով՝ դատարանի որոշումն անօրինական եւ անհիմն է:
 
Հիշեցնենք՝ այսօր շուրջ 9 ժամ շարունակ ընթացավ Գագիկ Ծառուկյանի գործով դատական նիստը: Նիստի սկզբում պաշտպանները ինքնաբացարկի միջնորդություն ներկայացրին դատավորին, որը, սակայն, այն մերժեց՝ բավարար հիմքերի բացակայությամբ պայմանավորված: Դրանից հետո արդեն սկսվեց բուն միջնորդության քննությունը:
 
Գագիկ Ծառուկյանը մեղադրվում է ՀՀ քրեական օրենսգրքի 154.2-րդ հոդվածի 2-րդ մասով՝ ընտրողին անձամբ կամ միջնորդի միջոցով ընտրողի կամ այլ անձի համար կաշառք տալու համար: Նա առաջադրված մեղադրանքը քաղաքական հետապնդում է որակում:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել