Հարավաֆրիկյան Հանրապետության Նելսոն Մանդելայի անվան համալսարանի գիտնականներն առաջին անգամ տեսաձայնագրել են, թե ինչպես են պինգվինները «խոսում» ջրի տակ: Այս մասին տեղեկացնում է sciencealert.com կայքը:
Առաջ գիտնականները նկարահանման տեխնիկական դժվարությունների պատճառով ոչինչ չգիտեին պինգվինների ստորջրյա վոկալիզացիայի մասին, սակայն այս անգամ գիտնականներին հաջողվել է տեխնիկան տեղադրել մի քանի պինգվինի մեջքին:
Արդյունքում գիտնականները 203 տեսանյութեր են ստացել: Հատկանշական է, որ վոկալիզացիայի 73%-ը գրանցվել է սուզման ստորին փուլում:
Ձայների կեսից ավելին պինգվինները հանել են որսի ժամանակ: Նրանք «խոսում են» որսին հետապնդելու նպատակով իրենց ընթացքն արագացնելուց, ինչպես նաև որսին բռնելու փորձից հետո:
Պարզվել է, որ ենթանտարկտիկական պինգվինները ջրի տակ իրար ազդանշան են տալիս խմբերի ձևավորման ժամանակ, իսկ աֆրիկյանները` միասին լողալու ընթացքում և ձկան խայծի համար:
Գիտնականները դեռևս չգիտեն՝ ինչպես է պինգվիններին հաջողվում ձայներ հանել 200 մետրի չափ մեծ խորության վրա:
