Անգլիայում, Քինգսթոն-ափոն-Հոլլ քաղաքի բնակչուհին խցանման մեջ երեխա է լույս աշխարհ բերել: Ինչպես հաղորդում է Mirror պարբերականը՝ նրա ամուսինը փրկել է նրան և երեխային մարզակոշիկի քուղի օգնությամբ:
24-ամյա Հոլի Լոութորփը պատահաբար էր իմացել իր չորրորդ հղիության մասին հղիության 22-րդ շաբաթում:
Նոյեմբերի 19-ին կնոջ մոտ սկսվել են ծննդաբերական ցավերը: Նա, իր ամուսինն ու մայրը միասին մեքենա են նստել և հիվանդանոց են գնացել:
Ճանապարհին Հոլիի ջրերը գնացել են, սակայն մեքենան խցանման մեջ է հայտնվել: Արդյունքում կինը ծննդաբերել է մեքենայի հետևի նստարանի վրա: Սակայն նորածին աղջիկը սկսել է կապտել, քանի որ պորտալարը փաթաթվել էր նրա վզին և թույլ չէր տալիս շնչել:
Փոքրիկի հայրը շտապ օգնություն է կանչել, սակայն մինչև բժիշկները կժամանեին, նա հանել է իր կոշիկի կապը և դրանով ձգել է պորտալարը: Մի քանի րոպեից ժամանել են բժիշկները, կտրել են պորտալարը և մորն ու երեխային հիվանդանոց են տեղափոխել:
Ծնողները երեխային Վերիթի են անվանակոչել: Հիմա նրա կյանքին վտանգ չի սպառնում: