Ցանկացած հարաբերություն (նույնիսկ «ամենաթունոտը») ինչ-որ մի բանի վրա հենվում է: Հարցը միայն այն է, թե ինչն է այստեղ «սուպերսոսնձի» դեր կատարում: Ի՞նչն է պահում կնոջը տղամարդու կողքին, որը նրան ամեն կերպ վիրավորում է և երբեմն նույնիսկ ձեռք բարձրացնում կնոջ վրա:
Կամ երկրորդ տարբերակը. զուգընկերները հոգնեցրել են միմյանց, բայց շարունակում են միասին ապրել: Ի՞նչն է պահում նրանց, ո՞րն է սրա գաղտնիքը:
Կան շատ պատճառներ, որոնք պահում են կնոջը վիրավորական հարաբերություններում: Ահա 5 ամենատարածվածները՝ ըստ հոգեբանների:
1. Սովորություն
Զգացմունքները կարծես թե մարել են, բայց զուգընկերները լավ են ճանաչում և հասկանում միմյանց: Բաժանվել չեն ուզում, քանի որ այդ դեպքում ստիպված են լինելու փոխել ողջ կյանքը:
2. Չիրականացած սպասումներ
Որքան էլ որ տարօրինակ է, որոշ կանայք շարունակում են մնալ զուգընկերոջ հետ տաղտկալի հարաբերություններում միայն այն պատճառով, որ իրենց մոտ հարաբերությունների գեղեցիկ պատրանք է ստեղծվել: Պատրանքներից հրաժարվելն այնքան էլ հեշտ չէ և հետո ափսոս է զուր ծախսված ժամանակը:
3. Կյանքի սցենար
Հաճախ կնոջը նման «անկենդան» հարաբերություններում պահում են կյանքի «կարգավորումները», որոնք նրանք ստացել են ծնողներից. «Կդիմանաս՝ կսիրես», «Մեր ցեղում դեռ ոչ ոք չի բաժանվել», «Սա քո խաչն է, պետք է տանես»:
4. Զուգընկերոջ մանիպուլյացիաները
Պետք չէ մտածել, թե «անկենդան» հարաբերություններում կանայք մշտապես տառապում են: Վտանգ զգալով՝ տղամարդն իր զոհին պարուրում է խնամքով, հոգատարությամբ, սիրով ու կրքով այն աստիճանի, որ կինը հավատում է, որ իրենց մոտ ամեն բան լավ կլինի: Ցավոք, այս փուլը երկար չի ձգվում:
5. Վախ
Միայնության նկատմամբ վախը կարող է ստիպել երկար տարիներ մնալ «անկենդան» հարաբերություններում: Իսկ ավելի սարսափելի է, երբ կինն իր զուգընկերոջից հնարավոր բացասական ռեակցիաներ է սպասում՝ զայրույթ, ագրեսիա, մեղադրանքներ, վրեժ:
Ինչ անել նման դեպքում
Պետք է հասկանալ, որ կանայք հաճախ են շարունակում ապրել թունոտ հարաբերություններում ոչ թե, որ դա իրենց դուր է գալիս, այլ որովհետև չեն կարող հեռանալ:
Բանն այն է, որ հաճախ բռնակալ ամուսնուց հեռանալը կարող է վատ վերջանալ կնոջ համար, անգամ մահով:
Տնային բռնության դեպքում պետք է անմիջապես դիմել օրինապահ մարմիններին: Բացի այդ՝ պետք է կինն այնպես անի, որ տղամարդը հասկանա, որ նա կարող է ինքն իրեն պաշտպանել, օգտվեք ընկերների աջակցությունից, տեղյակ պահեք ձեր շրջապատին: Մի վախեցեք պաշտպանել ձեր իրավունքները:
Իսկ եթե ձեր հարաբերությունները սպառել են իրենց, պարզապես միմյանց հաջողություն մաղթեք այլ զուգընկերոջ հետ:
