Bravo.am-ը գրում է.
Վրացի հայտնի երգիչ, երաժիշտ Սոսո Պավլիաշվիլին սեպտեմբերի 17-ին մենահամերգով հանդես կգա Երեւանում: Հատկանշական է, որ այս անգամ նրան նվագակցելու է հայ երաժիշտներից կազմված «Նավերեյ» նվագախումբը, որի անդամները մեկ նախագծում են հավաքվել հատուկ այս համերգաշարի համար:
Պավլիաշվիլին օրերս այստեղ էր՝ մասնակցելու համերգի նախապատրաստական փորձերին: Այդ ընթացքում BRAVO.am-ը հասցրել է հանդիպել եւ բացառիկ հարցազրույց ունենալ հայտնի երգչի, ինչպես նաեւ երաժիշտ Արտակ Ներսիսյանի հետ, ով էլ գլխավորում է «Նավերեյ» նվագախումբը: Երաժիշտներին կարող եք տեսնել նաեւ մեր ֆոտոշարքում, որն արվել է երեկվա համերգային փորձի ժամանակ:
Մեզ հետ զրույցում Սոսո Պավլիաշվիլին ասաց, որ համերգի ժամանակ ներկայացնելու է իր նոր ալբոմը, որտեղ ընդգրկված են ինչպես նոր, այնպես էլ սիրված երգերի նոր մշակումներ.«Մեր պատրաստած ծրագրում գրեթե բոլոր երաժշտական ժանրերը կան՝ ե՛ւ նորաոճ երաժշտություն, ե՛ւ միշտ արդիական, հավերժական երաժշտություն: Լինելու է միայն ամենալավը՝ վերցված անցյալից, մեծանուն վարպետների երաժշտությունից, որոնցից մենք սովորել ենք՝ սկսած Մոցարտից, վերջացրած Սթիվի Ուանդերով: Էլ չեմ խոսում մեր արմատների մասին՝ Եթիմ Գուրջի, Սայաթ-Նովա, վրացական եւ հայկական ֆոլկլոր, կովկասյան երաժշտություն, ջազ, բլյուզ եւ այլն»:
Շարունակելով խոսել համերգային ծրագրի եւ հայ երաժիշտների հետ համագործակցության մասին՝ երգիչն անկեղծացավ, որ իրենք միասին պատմություն են կերտում՝ ստեղծելով որակյալ ու մնայուն երաժշտություն.«Երբ Արտակը նվագում է շրթհարմոնով, այնպիսի տպավորություն է, որ մենք լրիվ այլ աշխարհում ենք: Տղաների նվագելու ժամանակ անբացատրելի հաճույք ես զգում, եւ առաջին իսկ ակորդներից սկսում ես հարգել այն, ինչ անում ես: Մենք լավ իմաստով ընկնում ենք տրանսի մեջ, մենք միասին ստեղծում ենք հավերժական երաժշտություն: Համերգին կհնչեն երգեր իմ հին երգացանկից, կլինեն նաեւ նոր երգեր նոր ալբոմից, որը կոչվում է «Жизнь - это кайф», ինչպես եւ մեր համերգային ծրագիրը»,- նշեց Պավլիաշվիլին:
Ամբողջական հոդվածը կարող եք կարդալ այստեղ
