ԱՄՆ նախագահ Բարաք Օբաման, որը ժամանել է Հարավային Աֆրիկա, ծրագրում է հանդիպել երկրի նախագահ Ջեյքոբ Զումայի հետ, հաղորդում է BBC-ի ռուսական ծառայությունը:
Օբամայի ինքնաթիռը Պրետորիայի օդանավակայանում վայրէջք է կատարել երեկ երեկոյան:
Այդ շրջագայության ընթացքում Օբաման կայցելի Աֆրիկա մայրցամաքի երեք երկրներ:
Օբաման Հարավաֆրիկյան Հանրապետություն է ժամանել՝ իր հարգանքը հայտնելու այդ երկրի նախկին նախագահ Նելսոն Մանդելային, որը կարողացավ երկրում վերջ տալ ապարտեիդի ռեժիմին:
Օբաման Մանդելային բնորոշել է որպես «ամբողջ աշխարհի հերոս»: Դրա հետ միասին, իր այցի նախօրեին նա հայտնել է, որ չի ծրագրում այցելել այն հիվանդանոց, որտեղ պայքարում են 94-ամյա Մանդելայի կյանքի համար:
Նախագահական ինքնաթիռում Օբաման լրագրողներին հայտնել է, որ չի պատրաստվում լուսանկարվել լուսանկարչական խցիկների առաջ: «Ինձ հարկավոր չէ հերթական ֆոտոսեսիան: Ես չեմ ուզում լուրերի թիրախ լինել այն ժամանակ, երբ Նելսոն Մանդելայի ընտանիքը տանջվում է նրա առողջական վիճակի պատճառով»:
Նա նաև հավելել է. «Առաջին հերթին ես ցանկանում եմ իմ խոսքերը հասցնել նրա ընտանիքին, այլ ոչ թե հենց անձամբ նրան: Դա երախտապարտություն է տարիների ընթացքում նրա ղեկավարման համար: Ամերիկացիները աղոթում են նրա, նրա ընտանիքի ու նրա երկրի համար»:
Օբաման Հարավաֆրիկյան Հանրապետություն է ժամանել Սենեգալից:
