Pastinfo.am-ը գրում է.
Այս պահի դրությամբ 85 հոգի դիմել է մեզ, որոնց արդեն աշխատանք ենք առաջարկում։ «Փաստինֆո»-ի հետ զրույցում ասաց Տավուշի մարզպետ Հայկ Չոբանյանը։ Նրա վստահեցմամբ տվյալ պահի դրությամբ Տավուշում առկա է 322 աշխատատեղ։
«Տարբեր ոլորտներում գրանցված 322 աշխատատեղ կա։ Դրանցից 171-ը միջին մասնագիտական են, իսկ մնացածը պահանջում են բարձրագույն կրթություն», - ասաց մարզպետը՝ ավելացնելով, որ բարձրագույն կրթություն պահանջող աշխատատեղերում աշխատավարձը սկսում է 120 հազ դրամից, իսկ միջին մասնագիտական աշխատատեղերում՝ ամենացածրը 50 դոլարից։
«Բերդի տարածաշրջանում ունենք 111, Իջևանի տարածաշրջանում՝ 19, Նոյեմբերյանում՝ 44, Դիլիջանում՝ 28 թափուր աշխատատեղ։ Իջևան և Բերդ համայքներում ունենք նաև 1000-ից ավել պայմանագրային զինծառայողների աշխատատեղ», - ավելացրեց Հայկ Չոբանյանը։
Տավուշի մարզպետի խոսքով Իջևանում այժմ հանգիստ և համեմատաբար ավելի առողջ մթնոլորտ է, քանի որ անտառներն այլևս չեն կտրում։
Հիշեցնենք, որ հուլիսի 17-ին՝ Իջևանում, «փայտի գործով» զբաղվող մոտ 600 հոգի փակել էին միջպետական ճանապարհը՝ պահանջելով անտառահատման արգելքի վերացում, արդեն հատված անտառանյութն անտառից դուրս բերելու իրավունք և հանդիպում այն պաշտոնյայի հետ, որն արգելել է անտառից փայտ դուրս բերել։ Ավելի ուշ մարզպետը հայտարարել էր, որ այստեղ սոցիալական որևէ խնդիր չկա, քանի որ մարզպետարանում հանդիպել է այդ անձանց հետ և ասել, որ 200-ից ավել աշխատատեղ կա։