Shantnews.am-ը գրում է.
Տարածքային կառավարման և ենթակառուցվածքների փոխնախարար Հակոբ Վարդանյանը այսօր լրագրողների հետ խոսել է օրեր առաջ տեղի ունեցած մասշտաբային հոսանքազրկման վարկածների մասին.
«Այս պահին կա երկու վարկած, մեկի համաձայն` տատանումը եկել է իրանական կողմից, ըստ մյուս վարկածի` դա մեր ներքին ռեսուրսների խնդիրն է եղել: Մենք չենք բացառում, որ աղետը տեղի է ունեցել տեխնոլոգիական խնդրի պատճառով: Հիմա ճիշտ չէ կտրված բաներ ասել, որ հետագայում հերքվեն այդ տարբերակները»:
Փոխնախարարը նշել է, որ դեպքի առաջին իսկ րոպեներից իրանցի գործընկերներից վթարի մասին հաղորդում է ստացվել, սակայն հետո նշվել է, որ վթարը եղել է տեղական և չի հասել էլեկտրահաղորդման գծին:
Հակոբ Վարդանյանը ասաց, որ ըստ օրենքի` հետաքննությամբ պետք է զբաղվեն տեսչական մարմինները, սակայն դրանից բացի, ստեղծվել է աշխատանքային խումբ և հավանաբար մոտ մեկ ամսվա ընթացքում պատճառները կպարզվեն:
Տարածքային կառավարման և ենթակառուցվածքների փոխնախարարը նշել է, որ հաքերային հարձակումներից պաշտպանումը բարձր մակարդակում է գտնվում, և Հայաստանում այժմ գործում է այսօր աշխարհում առկա լավագույն անվտանգության համակարգը:
«Վթարի հզորությունը այնքան մեծ էր, որ հնարավոր է՝ համակարգը զրոյի նստեր և ունենայինք լիարժեք էներգամատակարարման դադարում, որը հնարավոր կլիներ վերականգնել օրերի ընթացքում, սակայն մենք տեսանք, որ մեր համակարգը նման մասշտաբային վթարի պատրաստ է եղել»:
