Վրաստանի խորհրդարանի մեծամասնության ներկայացուցիչ Գիա Ժոժոլիանիի նախաձեռնությամբ հաջորդ շաբաթ սկսվելու է նախագահ Միխեիլ Սաակաշվիլիի պաշտոնանկության գործընթացը, տեղեկացնում են վրացական լրատվամիջոցները: Այդ մասին պատգամավորն անձամբ հայտարարել է լրագրողների հետ հանդիպման ժամանակ:
«Կարծում եմ, որ Սաակաշվիլիին իմպիչմենթ հայտարարելու համար բավականին շատ հիմքեր ունենք»,-ասել է Ժոժոլիանին:
Նա հույս է հայտնել, որ խորհրդարանի մեծամասնությունը կաջակցի այդ նախաձեռնությանը: Ժոժոլիանիի խոսքերով, իմպիչմենթն անհրաժեշտ է ոչ նրա համար, որ «Սաակաշվիլին այլևս նախագահի աթոռին չլինի: Դա այսպես թե այնպես հոկտեմբերին լինելու է, այլ նրա համար, որպեսզի Վրաստանի հասարակությունը լիովին գիտակցի հանցավոր ռեժիմի կործանիչ գործողությունները և պատասխանատվության ենթարկի այդ ռեժիմի ճարտարապետին»:
