Ռոբերտ Քոչարյանի գործով վարույթը կասեցնելու մասին որոշում կայացրած և Սահմանադրական դատարան ուղարկած դատավոր Դավիթ Գրիգորյանը ՍԴ-ից հետ է վերցրել գործի նյութերը՝ պատճենահանելու և Վերաքննիչ դատարան ուղարկելու համար։ Այս մասին տեղեկացրել են «Ազատությանը»։
«Հրապարակ»-ի հետ զրույցում Քոչարյանի պաշտպաններից Հովհաննես Խուդոյանը դրա վերաբերյալ նշեց․ «Սա որեւէ տեղ գրված պրոցես չի, չենք կարող մեկնաբանել՝ դրա իրավունքը կա՞, թե՞ չկա, չենք կարող մեկնաբանել: Որպեսզի դատավարության որեւէ կողմը իրավունքի խախտում չփորձի փնտրել էստեղ, կարծում եմ՝ տրամաբանական գործողություն է: Այն անձինք, որոնք կարծում են, որ իրենց իրավունքները սահմանափակվել է, այդ առարկությունից զերծ մնան»:
Հարցին, թե պետք է ծանուցվե՞ն կողմերը, պատասխանեց․ «Չեն տեղեկացրել, կարծում եմ՝ չեն էլ տեղեկացնի: Ինչ-որ կարեւոր բան չեմ տեսնում էդտեղ»:
Հիշեցնենք, որ դատավոր Դավիթ Գրիգորյանը երկրորդ նախագահ Ռոբերտ Քոչարյանի խափանման միջոց կալանավորումը փոփոխելու վերաբերյալ որոշում էր կայացրել՝ Արցախի նախկին եւ ներկայիս նախագահների անձնական երաշխավորությամբ:
