Հարգելի՛ հայրենակիցներ,

Արդյունավետ համարելով շփման այս ձևաչափը՝ որոշում եմ կայացրել հետայսու համապարփակ կերպով անդրադառնալ իմ վարչապետության տարիներին կառավարության կողմից իրականացված զարգացման որոշ ծրագրերի, որոնք թեև ժամանակին լուսաբանվել են լրագրողական համայնքի կողմից, սակայն արձանագրված ամփոփ արդյունքների, դրանց ունեցած դրական և բացասական հետևանքների մասին պրոֆեսիոնալ մակարդակում քիչ է խոսվել, ուստի ընդունեք սա որպես թափանցիկ և հրապարակային հաշվետվություն` վերջին ավելի քան մեկ տասնամյակի ընթացքում հայրենի կառավարության կատարած աշխատանքների մասին:

Ընդհանրապես, նշեմ, որ գործադիր իշխանության ղեկավարի պաշտոնն ստանձնելուն պես երկու հիմնական խնդիր էի դրել իմ առաջ՝ բոլոր ջանքերն ուղղել Արցախի էներգետիկ և պարենային անկախությունն ապահովելուն: Դրանք, ըստ իս, այն երկու կարևոր գործոններն են, որոնց ձգտում են աշխարհի բոլոր զարգացած երկրները, որպեսզի կայուն, անվտանգ և երկարատև զարգացման համար արտաքին ազդեցությունից կախվածություն չունենան։

Այս առումով առաջին ծրագիրը, որն ընտրել եմ այս գրառման մեջ ներկայացնելու համար, վերաբերում էր հանրապետությունում փայտանյութից, ծղոտից և եղեգնից ջեռուցման նպատակով էկոբրիկետների արտադրության կազմակերպմանը: Ծրագիրն ուներ թե՛ տնտեսական, թե՛ բնապահպանական նշանակություն։

Աշխատանքային մակարդակում քննարկումները սկսել ենք 2010 թ.-ին։ Նախաձեռնության նախապատմությունը կրկին պայմանավորված էր այդ տարիներին Հայաստանի Հանրապետություն ներկրվող բնական գազի և նավթամթերքի գների հնարավոր թանկացմամբ: Բացի Մաղավուզի քարածխի հանքի շահագործումից՝ կառավարության օրակարգում ներառել էինք էներգետիկ այլընտրանքային աղբյուրների քննարկման հարցերը: Այդ կապակցությամբ աշխատանքային խորհրդակցություն էի հրավիրել, որին մասնակցում էին գործարար և գիտական շրջանակի ներկայացուցիչներ, ոլորտի պաշտոնյաներ: Նրանց հորդորել էի կարճ ժամանակում առաջարկություններ ներկայացնել գործնական քայլեր ձեռնարկելու համար:

Ներկայացված առաջարկների հիման վրա պետական աջակցությամբ Ստեփանակերտում մասնավոր ներդրողների կողմից կառուցվել է ջեռուցման կաթսանների և վառարանների արտադրության ժամանակակից գործարան, ինչպես նաև հանրապետության շրջաններում հիմնադրվել են բրիկետի արտադրության կազմակերպություններ: 2011 թ.-ին ծրագրի հաջող մեկնարկից հետո իմ պնդմամբ այն նախ ներդրվել է Պաշտպանության բանակում, և առաջին փուլով սկսել են առաջնագծի, ապա նաև զորամասերի՝ դիզելային վառելիքով և էլեկտրական տաքացուցիչներով աշխատող ջեռուցման համակարգերի՝ հայրենական արտադրության այս նոր համակարգով փոխարինումը, որը միաժամանակ կարող է աշխատել և՛ բրիկետով, և՛ սովորական փայտով, և՛ քարածուխով:

Արդյունքում տեղադրման օրվանից առ այսօր կամ վերջին վեց տարիների ընթացքում միայն Պաշտպանության բանակը խնայել է ավելի քան 10 մլն ԱՄՆ դոլար։ 

Բացի ջեռուցումից՝ այն հնարավորություն է տվել նաև, որպեսզի առաջնագիծն ապահովվի տաք ջրով, իսկ ջերմակարգավորիչ ֆունկցիայի շնորհիվ դիրքապահ զինվորների շրջանում կտրուկ նվազել է սուր-շնչառական վարակով հիվանդությունների ցուցանիշը: Քանի որ մինչ այդ դիրքերում գետնատնակները (блиндаж) տաքացվում էին դիզելային վառելիքով, որը նորմայից ավելի բարձր ջերմաստիճան էր ապահովում, և դրսում «հովանալու» զինվորների ցանկությունը հաճախ մրսածության պատճառ էր դառնում: Եթե չասենք, թե ինչպիսի թունավոր արտանետումներ են գոյանում դիզվառելիքի այրումից…

Խնայողությունն էր պատճառը, որ ծրագրում ներառվել է հանրապետության դպրոցական, բնակելի, համայնքային բոլոր նորակառույց, ինչպես նաև դեռևս չգազաֆիկացված համայնքների հանրային նշանակության շենքերի մի մասը:

Իհարկե, քանի որ հետագայում բնական գազի սակագնի թանկացում տեղի չունեցավ, տնտեսվարողների կողմից բրիկետի արտադրությունը մեծ հետաքրքրություն այլևս չառաջացրեց՝ չնայած իրացման պահանջարկը մի քանի անգամ ավելին է, քան առկա արտադրանքը։ Փոխարենը խնդիրը միառժամանակ լուծվում է սովորական վառելափայտով, իսկ որոշ հիմնարկներում՝ տեղական քարածուխով:

Փայտանյութի մատակարարման գործով ներկայումս զբաղվում են մեկ տասնյակից ավելի կազմակերպություններ: Սեզոնային շրջանից կախված՝ ծրագիրն իր օժանդակ ծառայություններով ապահովում է 200-300 աշխատատեղ, իսկ պետական բյուջե կատարվող հարկային վճարները տարեկան կազմում են տասնյակ միլիոն դրամներ:

Ի դեպ, ողջունելի է, որ բրիկետի արտադրության հանդեպ ներկայումս մեծ հետաքրքրություն կա Հայաստանի Հանրապետության կառավարության կողմից: Պատրաստակամ ենք Արցախում ձեռք բերած դրական փորձը կիրառել հայրենիքի այլ հատվածներում այդ ուղղությամբ ծառացած խնդիրների լուծմանն ի նպաստ:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել