Աֆրիկյան Սուդան պետության բանակն արտահերթ նիստի ժամանակ որոշել է պաշտոնանկ անել երկրի նախագահ Օմար ալ Բաշիրին՝ լուծարելով կառավարությունը, հաղորդում է Al Arabiya-ն՝ աղբյուրին հղումով:
Զինվորականները հայտնել են ռազմական խորհրդի ստեղծման մասին, որն անցումային շրջանում կղեկավարի երկիրը: Դա կարող է տևել 1 տարի:
Պարբերականի տվյալներով՝ բանակը հսկողության տակ է վերցրել նախագահական պալատը, ռադիոն և հեռուստատեսությունը: Ալ Բաշիրի թիկնապահը ձերբակալվել է, իսկ ինքը՝ նախագահը, տնային կալանքի տակ է առնվել: Հեղաշրջման ֆոնին ձերբակալվել են նաև պաշտպանության նախկին նախարարն ու այլ պաշտոնյաներ:
Հիշեցնենք, որ վերջին շաբաթներին Սուդանում բողոքի զանգվածային ցույցեր էին ընթանում, որոնց մասնակիցները պահանջում էին նախագահ Օմար ալ Բաշիրի հրաժարականը՝ փորձելով ստիպել զինված ուժերին ընտրություն կատարել «ժողովրդի և բռնապետության» միջև:
Նման ցույցերը սկսվել էին դեռևս 2018թ.-ի դեկտեմբերին, սակայն ոստիկանությունը մինչ այժմ կոշտ միջոցներ է ձեռնարկել ցուցարարների նկատմամբ, մինչդեռ Սուդանի զինված ուժերը բողոքի ցույցերի ճնշման գործում ներգրավված չի եղել:
Ակտիվիստներն ի սկզբանե բողոքել են հացի գների կտրուկ աճի դեմ, սակայն շուտով նրանց զայրույթն ուղղվել է երկրի նախագահի դեմ, ինչը հանգեցրել էր փետրվարին երկրում արտակարգ դրության սահմանմանը և հավաքների ազատության սահմանափակմանը: Չնայած դրան՝ մարդիկ շարունակել են նախագահի հրաժարականի պահանջով փողոց դուրս գալ:
Օմար ալ Բաշիրն իշխանության է եկել 1989 թ.-ին, իսլամիստների կողմից հեղաշրջման արդյունքում:
Օմար ալ Բաշիրը
