Նիհարելու համար միայն առողջ սնուդը բավական չէ։ Կարևոր է նաև, որ ձեր հորմոնները լինեն հավասարակշռված։
Թեև ավելորդ քաշից ազատվելն այդքան էլ հեշտ չէ, այնուամենայնիվ, առաջադրանքն ավելի կբարդանա, եթե դուք հորմոնալ անհավասարակշռություն ունենաք։ Հորմոնները ղեկավարում են այնպիսի ֆունկցիաներ, ինչպիսիք են նյութափոխանակությունը, բորբոքումը և այլն։
Հորմոնների հավասարակշռությունը կարող են խախտել սթրեսը, գենետիկ դասավորվածությունը, սխալ ապրելակերպը, ինչը դանդաղեցնում է նյութափոխանակությունը, հանգեցնում է մարսողական համակարգի խանգարման, անկառավարելի սովի և, վերջիվերջո, ավելորդ քաշի։
Այս հորմոնները հաճախ դառնում են քաշի ավելացման պատճառ։ Ի՞նչ է պետք անել, որպեսզի դրանք հավասարակշռվեն։
Ինսուլին
Ինսուլինը հորմոն է, որն արտադրվում է ենթաստամոքսային գեղձի կողմից։ Այն կարգավորում է արյան մեջ շաքարի քանակը։
Եթե դուք տառապում եք ավելորդ քաշից, նշանակում է, որ ինսուլինն անհավասարակշռության մեջ է գտնվում՝ ինչի պատճառով դժվարանում է նիհարելը։
Միևնույն ժամանակ, եթե դուք քաղցրի սիրահար եք, նշանակում է, որ ձեր ինսուլինը նորմայից ավել է աշխատում, որպեսզի արյունը ազատի շաքարից։ Ավելորդ շաքարն էլ պահպանվում է ճարպի տեսքով։
Ինչպե՞ս կարգավորել ինսուլինը
- Պարբերաբար ստուգեք արյան մեջ շաքարի պարունակությունը։
- Զբաղվեք ֆիզիկական վարժություններվ։
- Օրական օգտագործեք 3-4 լիտր ջուր։
- Սննդակարգի մեջ ավելացրեք ձիթապտղի յուղ, ճարպոտ ձուկ, ընկույզ, որպեսզի կարգավորեք օմեգա-3 ճարպաթթվի աշխատանքը։
Լեպտին
Սովորաբար լեպտին հորմոնը մեզ հաղորդում է, որ արդեն հագեցել ենք։ Սակայն շաքարով հարուստ սնունդ շատ օգտագործելու պատճառով ավելորդ ֆրուկտոզը վերածվում է ճարպի, որը տեղ է գտնում երիկամների, փորի և մարմնի այլ շրջաններում։
Ճարպի բջիջները սկսում են շատ լեպտին արտադրել, և որքան ավելանում է շաքարի օգտագործումը, այնքան ավելանում է նաև լեպտինի արտադրությունը։ Օրգանիզմը լեպտինի հանդեպ քիչ զգայուն է դառնում, և ուղեղը դադարում է նրանից հագեցվածության ազդանշաններ ստանալ։
Ինչպե՞ս նվազեցնել լեպտինի քանակը
- Ձեզ անհրաժեշտ է լիարժեք հանգիստ։ Հետազոտությունները ցույց են տվել, որ անքնությունը կարող է հանգեցնել լեպտինի նվազեցման, ինչի պատճառով ուղեղը բաց է թողնում հագեցվածության մասին ազդանշանները։ Քնեք օրական 7-8 ժամ։
- Սնվեք յուրաքանչյուր 2 ժամը մեկ։
- Մի մոռացեք ջրի մասին, քանի որ ջրազրկումը նույնպես կարող է սովի պատճառ դառնալ։
Գրելին
Այս հորմոնը հայտնի է որպես «քաղցի հորմոն», այն խթանում է սնվելու ցանկությունը և մեծացնում է կուտակվող ճարպի քանակը։ Այն հիմնականում արտադրվում է ստամոքսում, որոշ քանակությամբ՝ նաև բարակ աղիքում, ուղեղում և ենթաստամոքսային գեղձում։
Արյան մեջ գրելինի բարձր մակարդակը կարող է հանգեցնել քաշի ավելացման, իսկ ճարպակալմամբ տառապող մարդիկ ավելի զգայուն են դառնում այս հորմոնի հանդեպ։
Ինչպե՞ս նվազեցնել գրելինի մակարդակը
- Սնվեք յուրաքանչյուր 2-3 ժամը մեկ։
- Կերեք թարմ մրգեր, բանջարեղեն, սպիտակուցներ և օգտակար ճարպեր։
- Վարեք ակտիվ ապրելակերպ։
