Հարավաֆրիկյան Կրյուգերի ազգային պարկի վեց կենդանիներ սատկել են էլեկտրական հոսանքի հարվածից, հաղորդում է ABC News տեղեկատվական պորտալը:
Փոթորիկը հարվածել է մասամբ արգելոցի տարածքում տեղակայված Սկուկուզա քաղաքին, հունվարի 25-ին: Ուժգին քամուց հոսանքալարերը կտրվել են: Բաց հոսանքալարերին հպումից սատկել են ընձուղտն ու սպիտակ ռնգեղջյուրը:
Երկու առյուծ և երկու բորենիներ ցանկացել են ուտել սատկած կենդանիներին, սակայն նույնպես սատկել են հոսանքի հարվածից: «Կարծում եմ, այդ կենդանիները նույնպես դիպել են հոսանքի բաց լարերին: Սա շատ անիմաստ ողբերգություն է»,- ասել է ազգային պարկի ներկայացուցիչը:
Այգու աշխատակիցները կենդանիների դիերը հայտնաբերել են փոթորիկի հաջորդ օրը: Ռնգեղջյուրի եղջյուրը կտրել են և տեղափոխել անվտանգ վայր, որպեսզի այն բաժին չհասնի որսագողերին:
Կրյուգերի ազգային պարկը գտնվում է Հարավային Աֆրիկայի հյուսիս-արևելքում: Այն զբաղեցնում է մոտ 19 հազար քառակուսի կիլոմետր, որը համեմատելի է Իսրայելի տարածքի հետ: Այգում ապրում է մոտ 1.5 հազար առյուծ, 12 հազար փիղ, 2.5 հազար գոմեշ, մոտ հազար ընձառյուծ և 5 հազար ռնգեղջյուր:
