Shamshyan.com-ը գրում է.
Արդեն 1 ժամից ավելի է՝ Երևան-Աշտարակ ավտոճանապարհի Պռոշյան գյուղի վարչական տարածքում երթևեկությունը կաթվածահար է եղել։
Ինչպես տեղից հայտնում է ֆոտոլրագրող Գագիկ Շամշյանը, գյուղի բնակիչները՝ ի նշան բողոքի, դեպի Երևան իջնող ճանապարհահատվածը փակել են և պատճառաբանում են, որ երկար ժամանակ է՝ գյուղում տեղի են ունենում անասնագողության դեպքեր, սակայն ոստիկանությունը մինչև այսօր չի հայտնաբերել անասնագողերին։
Այս պահին բողոքի ակցիայի մասնակիցների հետ բանակցություն է վարում ոստիկանության Նաիրիի բաժնի պետի տեղակալը, սակայն բնակիչներն ասում են, որ ճանապարհը կբացենք այն ժամանակ, մինչև հայտնաբերվեն անասնագողերը։ Նշված հատվածում երթևեկությունը փորձում են կարգավորել Ճանապարհային Ոստիկանության 2-րդ սպայական գումարտակի 3-րդ վաշտի 1-ին դասակի ծառայողները՝ ավագ տեսուչ Աշոտ Մխիթարյանի գլխավորությամբ, երթևեկությունը միակողմանի դարձել է, սակայն դա հարցի լուծում չէ։
Գյուղացիներն ասում էին նաև, որ վերջին անասնագողության դեպքը տեղի է ունեցել երեկ, և գողը կամ գողերը տարել են 5 խոշոր եղջերավոր անասուն, ու ամեն մի խոշոր եղջերավոր անասունը կարժենար 400-450 հազար դրամ։ Քիչ առաջ ֆոտոլրագրողը հայտնեց, որ դեպքի վայր ժամանեցին Ոստիկանության Եղվարդի բաժնի պետ, Ոստիկանության գնդապետ Դավիթ Գևորգյանն ու ՃՈ 2-րդ սպայական գումարտակի 3-րդ վաշտի 1-ին դասակի հրամանատար Տիգրան Քոթանջյանը։ Բողոքի ակցիայի մասնակիցներն էլ Դ. Գևորգյանից պահանջում են, որպեսզի նա կապ հաստատի ՀՀ ոստիկանության պետ Վալերիյ Օսիպյանի հետ ու իրավիճակի մասին ՀՀ ոստիկանապետին տեղեկություններ փոխանցի։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
